Ойуур пуондата 256 мөл. тахса гаа сири ылар, мас саппааһынан Арассыыйа биэс бастыҥ эрэгийиэнин ахсааныгар киирэбит. 2018 с. бэттэх 2446,9 км. уһуннаах массыына суола оҥоһуллубут, ол иһигэр федеральнай суолталаах 534,9 км., 1896 км. суол өрөмүөннэммит, 47 күргэни туппуттар, 11 аэропуорт саҥардыллыбыт.
Дойдубутугар баар айылҕа баайын сыаната АХШ дуолларынан 2-5 трлн., инникитин өссө үрдүүр чинчилээх. Эрэгийиэн Арассыыйа алмааһын 81% хааччыйар, дойду үрдүнэн ураан 50% тахса, хорҕолдьун 36% саппааһа манна баар. Өрөспүүбүлүкэ сыл ахсын таас чоҕу, ньиэби, гааһы, кыһыл көмүһү хостуурга уһулуччу үрдүк кирбиини көрдөрөр.
Экэниэмикэбит ресурнай-сырьевой көрүҥнээх, айылҕа баайын хостуур бырамыысыланнас өрөспүүбүлүкэ бүддьүөтүн дохуотун 70% тахсаны нолуок быһыытынан биэрэр. Сиртэн хостуур баайбытын таҥастыырга бородууксуйаны оҥорон таһаарыы улахан ороскуоттааҕа атахтыыр. Онон переработка кииннэрэ өрөспүүбүлүкэ тас өттүгэр үлэлииллэр.
2018-2024 сс. үбүлээччилэр өрөспүүбүлүкэ экэниэмикэтигэр 3,7 трлн. солк. уктулар. Уһук Илин бу саамай үрдүк көрдөрүү, онтон дойду үрдүнэн 13 миэстэ. Ити киирбит үп-харчы улахан аҥаара «Сила Сибири» магистральнай гаас ситимин тутарга, Ленскэй улууһугар ньиэби хостуур Чайыҥдатааҕы ньиэптээх-гаастаах сири бэлэмнииргэ, Нерюнгри улууһугар таас чоҕу хостуур хампаанньалары үлэлэтэргэ, көмүһү хостуур салааны сайыннарарга туттулунна.
Санатан эттэххэ, кэлэр 2032 сылга, тус сыаллаах көрүүнэн 2050 сылга диэри өрөспүүбүлүкэ социальнай-экэнэмиичэскэй сайдыытын тосхолун туһунан олохтоох сокуон хайдах туолан иһэрин истэргэ Ил Түмэҥҥэ бырабыыталыстыба чааһа ыытыллыбыта. Сүрүн дакылааты СӨ Экэниэмикэтин миниистирэ Петр Попов оҥордо, кини 2018-2024 сс. тосхолу олоххо киллэрии түмүгүн, араас хайысхаларынан өрөспүүбүлүкэ туох ситиһиилээҕин кэпсээтэ. Ону таһынан, СӨ Тырааныспарга уонна суол хаһаайыстыбатыгар, СӨ Бырамыысыланнаска уонна геологияҕа, СӨ Дьиэҕэ-уокка, хомунаалынай хаһаайыстыбаҕа уонна энергетикаҕа министиэристибэлэрэ, СӨ Нэһилиэнньэтэ дьарыктаах буолуутун кэмитиэтэ туох үлэ ыытыллыбытын иһитиннэрдилэр.
Ааптар хаартыскаҕа түһэриитэ.
-
0
-
0
-
0
-
0
-
0
-
0
