-Муус устар 27 күнэ - Саха сирин олохтоохторугар, саха норуотугар умнуллубат бэлиэ күн. Бу күн автономияны турууласпыт уонна 1922 сыллаахха төрүттээбит улуу убайдарбыт сырдык ааттарыгар сүгүрүйэбит, хас биирдиилэрин пааматынньыктарын аттыгар миитиннэри тэрийэбит, махтал тылларын этэбит, сибэкки дьөрбөтүн уурабыт. Биир үйэттэн ордук кэм ааста да, норуот дьылҕатын төрдүттэн уларыппыт быһаарыы суолтата өссө дириҥээн иһэр курдук. Тоҕо диэтэр, өрөспүүбүлүкэбит модун Арассыыйа састаабыгар экэниэмикэтин сайыннарар, бүттүүн үөрэх-билии, барҕарыы суолугар үктэммит, бэйэтин бас билинэр буолбут бэлиэ күнэ.
Итини сэргэ, муус устар 27 күнүгэр 1992 сыллаахха Саха Сирин Төрүт сокуона - Конституциябыт ылыныллыбыт күнэ, өрөспүүбүлүкэбит саҥа сокуонунан уустук, дьылҕабыт быһаарыллар кэмигэр Арассыыйа састаабыгар субъект быһыытынан тулхадыйбат судаарыстыбаннай статуһа бигэргэммитэ.
Ити кэрдиис кэм бастакы Бэрэсидьиэммит Михаил Ефимович Николаев үлэтин-хамнаһын кытта быстыспат ситимнээх. Биир дойдулаахпыт, биир норуоппут диэн санаа барыбытын күүскэ кууспута, саҥа саҕахтарга сирдээбитэ, өрө көтөҕүллүү күүһүрбүтэ. Миэхэ тус бэйэбэр - сүүрбэһис үйэҕэ дойдубут тутулун уларыппыт, сайдыытын түстээбит саамай улахан устуоруйа кэрдиис кэмнэрэ: Өктөөп Өрөбөлүүссүйэтэ, Аҕа дойдуну көмүскүүр улуу сэриигэ норуот кыайыыта уонна автономияны ылыммыт күммүт буолар.
Саамай сүрүнэ - маны барытын үүнэр көлүөнэбитигэр сөпкө тиэрдэн, кинилэр инникитин эмиэ бэйэлэрин ыччаттарыгар өрөспүүбүлүкэ төрүттэммит күнүн суолтатын өйдөтүөх, кэпсиэх тустаахтар. Ситим быстыа суохтаах, бу - биһиги устуоруйабыт уонна инники сайдыыбыт түһэ.
Хаартыска: Саргын Скрябин, СИА, Ил Түмэн архыыбыттан.
-
0
-
0
-
0
-
0
-
0
-
0
