Арассыыйа Төрүт Сокуонунан бигэргэммит үлэлиир быраап биhиги дойдубут сүрүн сыаннастарыттан биирдэстэрэ, хас биирдии киhи дьоhуннаах олоҕун олуга буолар. Ыам ыйын 1 күнэ дойдубут уйгутун-быйаҥын хаҥатар, чэчирии сайдыытын мэктиэлиир, үлэһит дьону түмэр ураты суолталаах күн.
Саха сиригэр бу бэлиэ күнү мэлдьи өрө көтөҕүллүүлээхтик үөрэ-көтө көрсөбүт. Биhиги өрөспүүбүлүкэбит сайдыытын оҥкулун туппут араас көлүөнэ туруу үлэhит дьоммутун дириҥник махтанан туран ахтабыт-саныыбыт. Кинилэр үлэҕэ бэриниилэрэ, сатабыллара, эппиэтинэстэрэ норуот хаhаайыстыбатын араас салааларыгар үрдүк түмүктэри ситиhэргэ бөҕө тирэх буолар.
Өрөспүүбүлүкэ парламена дьарыктаах буолуу, үлэhит дьон быраабын көмүскээhин уонна эрэгийиэн уратыларыгар сөп түбэhэр үлэ усулуобуйатын тупсарыы боппуруостарыгар улахан болҕомтотун уурар. Анал байыаннай дьайыы кыттыылаахтарыгар, бэтэрээннэригэр уонна кинилэр дьиэ кэргэннэригэр эбии өйөбүл оҥоһуллар: үлэнэн хааччыйыы, үөрэххэ киирэргэ уонна эбии идэ ыларга көмө. Ыччакка, элбэх оҕолоох ыалларга, тус болҕомтоҕо наадыйар дьоҥҥо туhаайыллыбыт дьарыктаах буолуу бырагыраамаларын олоххо киллэрии биир сүрүн сорукпут буолар. Бу Сахабыт сирин олохтоохторо үлэлээх-хамнастаах, бигэ туруктаах олохтоох буолалларыгар, өрөспүүбүлүкэ социальнай-экэнэмиичэскэй сайдыытыгар туhуланар үлэ.
Ыам ыйын 1 күнэ —сандал саас салаллан кэлбитин, айылҕа тыллыытын, ону тэҥэ олоххо тардыhыыны кэрэhэлиир бэлиэ күн. Бу бырааһынньык хас биирдии дьиэҕэ дьолу-соргуну, этэҥҥэ буолууну аҕаллын. Эһиэхэ уонна дьиэ кэргэҥҥитигэр чэгиэн-чэбдик доруобуйаны, сылааhы-сырдыгы, бары саҕалааһыннаргытыгар ситиһиилэри баҕарабын.
Алексей Еремеев, Саха Өрөспүүбүлүкэтин
Ил Түмэнин Бэрэссэдээтэлэ
-
1
-
0
-
0
-
0
-
0
-
0
