Кини өрөспүүбүлүкэ 26 улууһугар 121 нэһилиэнньэлээх пуун ууга барар кутталлааҕын бэлиэтээтэ. Нэһилиэнньэни эвакуациялыырга быстах кэмҥэ олорор пууннары тэрийдилэр. Эбэ гидрологическай балаһыанньатыттан сыл ахсын буоларын курдук Хаҥалас уонна Нам, Индигирка кытылыгар Халыма улуустара ууга барар кутталлаахтар. Быйыл хаһааҥҥытааҕар даҕаны халыҥ хаар үллүктүү түстэ, онон Халыма, Индигирка, Дьааҥы өрүстэргэ уу таһыма үрдүк буолара күүтүллэр. Кыһын уонна кулун тутарга 2-2,6 төгүл элбэх хаар түстэ.
Кангалаас таһыгар Өлүөнэ эбэ мууһун халыҥа уонна Зырянкаҕа Үөһээ Халыма улууһугар муус 19-21 см. нуорматтан халыҥ диэн кэмнээбиттэрэ. Муус халыҥа харыыны таһаарыан сөп, онон нэһилиэнньэлээх пууннар, суол, уот ситимэ ууга барар кутталлаах.
Нам улууһугар 2 гидротиэхиньиичэскэй тэрил туруоруллубут, анал тиэхиньикэ дьуһуурустубаҕа тахсыаҕа. Дьокуускай куоракка Табаҕа, Хатас, Даркылаах, Тулагы, Сыырдаах, Капитоновка, Кангалаас гидротиэхиньиичэскэй тэрил кыайбатаҕына Марха сороҕо уопсайа 385 дьиэ ууга барар кутталлаах, онно 1714 киһи, 515 оҕо олорор. Итиннэ олорор нэһилиэнньэни сэрэппиттэр. Тулагыга быстах кэмҥэ олорор пуун аһыллыахтаах.
Халаан уутун этэҥҥэ аһарарга Өлүөнэ, Халыма, Бүлүү, Алдан, Амма, Нүүйэ, Токко өрүстэргэ 7 учаастакка 41 км. мууһу эрбииллэр. 859 гектар иэннээх 85 учаастакка мууһу кэбирэтэргэ хараардыы үлэтин ыыттылар. Күн сардаҥалара сылытан, бу учаастактар түргэнник ирэллэр, муус тэҥник алдьанар, харыы тахсыбат.
Маны таһынан, космомониторинг ситимин, «Орлан-10» пилота суох көтөр аалы, дьону сэрэтэргэ сыыппара ханаалын туһаналлар, итиэннэ аэромобильнай бөлөхтөрү бэлэмнээтилэр.
Хаартыска Андрей Сорокин, ЯСИА.
-
0
-
0
-
0
-
0
-
0
-
0
