2025 сыл түмүгүнэн Рослесхоз тыа хаһаайыстыбатын, нэһилиэнньэлээх пууннар сирдэригэр тиийбит ойуур баһаарыгар буруйдаахтары эппиэккэ тардарга, уоту умуруорар үлэ ороскуотун төлөтөргө этии киллэрбит. Ол эрэн сири-уоту бас билиигэ ойуур пуондатыгар киирбэт, өрүс кытыытыгар уу ылар учаастактара бааллар, онно ким хаһаайын буолара биллибэт. Андрей Коноплев былырыын хоту улуустарга турбут ойуур баһаара кураанах оту өртөөһүнтэн тахсыбытын чуолкайдаата. 16 буруйдаах киһини туппуттар, кинилэри эппиэтинэскэ тардыахтара.
Итиниэхэ олоҕуран, быйыл тыа хаһаайыстыбатын сиригэр өртөөһүнү боборго СӨ Экологияҕа, айылҕаны туһаныыга уонна ойуур хаһаайыстыбатыгар миниистир солбуйааччыта Андрей Коноплев этии киллэрдэ. Былырыыҥҥы өртөөһүн уотун умуруорарга күһүн кэлиэр диэри үлэлээбиттэрин санатта. Кини быйыл ойуур баһаара сүрүннээн от ыйыгар-атырдьах ыйыгар, этиҥнээх ардах кэнниттэн туруон сөп диэтэ.
Онуоха Ил Түмэн экэниэмикэҕэ, инвестиционнай уонна бырамыысыланнай бэлиитикэҕэ сис кэмитиэт бэрэссэдээтэлэ Павел Петров тыа хаһаайыстыбатын сиригэр өртөөһүнү толору боборго тыа хаһаайыстыбатынан дьарыктанар улуустар өртөөһүн наадатын туруорсалларын туһунан эттэ. Холобур, Хаҥалас улууһугар ыһыы үлэтин ыытарга сир тиийбэт. Ол иһин Тыа хаһаайыстыбатын министиэристибэтин кытта бу боппуруоһу дьүүллэһэр наадатын тириэртэ.
Нэһилиэнньэни айылҕа алдьархайыттан көмүскүүргэ, халаан уутун этэҥҥэ аһарарга, ойуур баһаарын аҕыйатарга, буруйдаахтары эппиэккэ тардарга Ил Түмэҥҥэ ыытыллыбыт оробуочай мунньахха ити боппуруоһу дьүүллэстилэр.
Хаартыска Андрей Сорокин, ЯСИА.
-
0
-
0
-
0
-
0
-
0
-
0
