«Кэм-кэрдии түргэнник ааһар, ыам ыйын ылааҥы сылаас күнүгэр сэбиэскэй норуот Кыайыы өрөгөйүн билбитэ, фашистар идеологиялара аан дойду үрдүнэн тарҕанарын тохтоппута. Кырыктаах кыргыһыыга биһиги норуоппут түмсүүлээх, Кыайыы туһугар дьүккүөрдээх буолан кыайыыны ситиспитэ. Кыайыы алтаарыгар мөлүйүөнүнэн киһи олоҕо толук ууруллубута, биһиги аҕаларбыт, эһэлэрбит, хос эһэлэрбит. Сэбиэскэй норуот аан дойдуга кимиэхэ да кыайтарбатын, өстөөҕү хайа баҕарар түгэҥҥэ кыайарын көрдөрбүтэ», — диэн бэлиэтээтэ Александр Николаевич.
Көрсүһүү иннинэ бырааһынньыктааҕы тэрээһиҥҥэ кэлбит бэтэрээннэр Кыайыы күнүн туһунан санааларын этэллэригэр көрдөстүм.
Саха АССР Үрдүкү Сэбиэтин 12 ыҥырыытын, Ил Түмэн иккис ыҥырыытын дьокутаата Раиса Семеновна Гурьева:
- Үрдүкү Сэбиэт 12 ыҥырыытыгар 1990 с. саҕаланыыларыгар 165 дьокутаат үлэлээбитэ. Ол кэми истиҥник-сылаастык саныыбын. Мин аҕам Семен Васильевич Афанасьев биир сыл кыргыһыы уоттаах хонуутугар сэриилэһэн баран улаханнык бааһыран, инбэлииккэ таһаарбыттара. Ол кэмтэн ыла 80-тан тахса сыл ааста. Билигин Германия, Франция, Польша биһиги дойдубутугар мөкү сыһыаннаахтар, Лариса Секлитова-Стрельникова кинигэтигэр аан дойдуга Арассыыйа улахан оруоллааҕын туһунан суруйар.
Билигин улахан уларыйыы буола турар, хас биирдии киһи тургутугу ааһар. Анал байыаннай дьайыыга Аҕа дойдуларын көмүскүү сылдьар уолаттарбытынан, дьоруойдарбытынан киэн туттабыт. Эзотериктар этэллэринэн, байыаннай дьайыы түргэнник бүтүө. Айыы Таҥара үөһэттэн барытын көрөр, Арассыыйаны араҥаччылыыр. Аҕам кэпсииринэн Курскай тоҕойугар өстөөх тааҥкаларын тохтоторго үөһэттэн сырдык айыылар көмөлөһөллөрө. «Өлбөт үйэлээх пуолкаҕа” оҕолорум, сиэннэрим эһэлэрин хаартыскатын туппутунан тахсаллар.
Бэтэрээннэри кытта көрсүһүү туһунан сиһилии "Ил Түмэн" хаһыат аныгыс нэдиэлэтээҕи нүөмэригэр ааҕыҥ.
Василий Кононов + ааптар хаартыскаҕа түһэриитэ.
-
0
-
0
-
0
-
0
-
0
-
0
