- Биһиэхэ, уруккута Сэбиэскэй сойууска уонна аныгы Арассыыйаҕа ыам ыйын 9 күнэ саамай ытыктанар, бэлиэ бырааһынньык. Ньиэмэстэр фашисткай эрэсиимнэрин суох оҥорон, дойдубутугар көҥүлү аҕалан, күн бүгүҥҥэ диэри үүнэ-сайда олоробут.
Дьон-сэргэ төрөөбүт ийэ дойдуларын көмүскээн, кырыктаах кыргыһыыларга хорсуннук охсуспуттарын өрө тутар, онон киэн туттар, дойдубутугар бэриниилээх буоллахпытына, дойдубут инники өттүгэр куттала суох буолуутугар бигэ тирэх баар диэн эрэниэххэ сөп. Онон Кыайыы күнүн улаханнык чиэстээн-буочуоттаан бэлиэтиибит.
Мин сэрии сылын оҕотобун, сэрии саҕаланарыгар 5 саастаах этим, онон кыһалҕалаах, аччык кэмнэри, кураан дьыллары эппинэн-хааммынан билбитим. Кыанар эр дьон бүтүннүү Аҕа дойдубутун көмүскүү барбыттара, үлэ үөһүгэр дьахталлар уонна оҕолор хаалбыттара. Бултаах-астаах аар тайҕабыт, балыктаах күөллэрбит баар буоланнар баччааҥҥа диэри тыыннаах кэлэн олоробут. Ыарахан дьылларга дурда-хахха буолбут, үрүҥ тыыммытын өрүһүйбүт айылҕабытыгар эмиэ махтаныах тустаахпыт.
Саха дьоно дойдуларын таптыыр, бэриниилээх, эр санаалаах, айылҕаттан харса суох инники күөҥҥэ сылдьар дьон. Бэл Рейхстагы сэриилээн ыларга саха саллаата Феодосий Донской баар этэ. Ону таһынан, айылҕаҕа сылдьан бултуу-алтыы үөрэммит буоламмыт, бэргэн ытааччылар элбэхтэр.
Онон Кыайыы туһугар саха дьоно дьоһун кылааттарын киллэрбиттэрэ. Чахчы дьоруойдуу охсуһан баран ол саҕана докумуону тиксэрии ситэ кыаллыбакка дьоруой аатын ылбакка хаалбыттар эмиэ бааллар. Үрдүкү Сэбиэккэ үлэлии сылдьан туруорсуу түмүгэр Бүлүү улууһуттан үс чаҕылхай саллаакка Сэбиэскэй Сойуус дьоруойа албан аатын иҥэрбиттэрэ. Билигин даҕаны бу үлэни салҕыахха сөп дии саныыбын, кыргыһыыга хорсун быһыыны көрдөрбүт дьоруойдар элбэхтэр. Улуу Кыайыы баар буолан күн бүгүн дьоллоохтук, көҥүллүк олоробут, иннибит диэки сайдабыт!
Василий Кононов хаартыскаҕа түһэриитэ.
-
1
-
0
-
0
-
0
-
0
-
0
