Кыайыы күнэ норуоттары уонна көлүөнэлэри ситимниир ураты суолталаах. Биир дойдулаахтарбыт улуу сыал туруорунан, кыайыыга дьулуурдарынан, модун санааларынан, хорсун быһыыларынан, аан дойдуну фашизмтан көмүскээбиттэрэ, бар дьоҥҥо олорор, үлэлиир, кэскили тутар кыаҕы биэрбиттэрэ. Төhө да сыл-хонук аастар, уоттаах сэрии хонуутугар, тыылга көҥүл уонна эйэ туhугар турууласпыт, Улуу Кыайыыны уhансыбыт дьоммут тустарынан сырдык өйдөбүл биhиги сүрэхпитигэр мэлдьи тыыннаах. Кинилэр көмүскээбит үйэлээх сыаннастара биhиэхэ биир сомоҕо буолан төрөөбүт дойдубутун көмүскүүр соругу сүктэрэр. Күн бүгүн анал байыаннай дьайыыга сылдьар байыастарбыт эһэлэрин, хос эhэлэрин сиэрдээх дьыалаларын салҕаан, дойдуларын чиэстээхтик көмүскүүллэр. Биhиги чугас дьоммут дьоруойдуу быhыыларын көлүөнэттэн көлүөнэҕэ тиэрдээри сыл ахсын киэн тутта кинилэр сырдык мөссүөннэрин тутан «Өлбөт тыыннаах полк» хаамыыга кыттабыт.
Саха сириттэн сэриигэ 62 тыhыынчаттан тахса буойун дойдутун көмүскүү барбыта. Кинилэр тустарынан ыраас өйдөбүл биhиги норуоппут сүрэҕиттэн хаhан да сүтүө суоҕа. Биhиги биир дойдулаахтарбытыттан 25 буойуҥҥа Сэбиэскэй Сойуус уонна Арассыыйа дьоруойун албан аата иҥэриллибитэ, 5 киhи Албан Аат уордьан толору кавалера буолбута. «Өйдөбүл бастионнара» историческай-патриотическай бырайыак чэрчитинэн Сталинградтааҕы кыргыһыыга кыттыбыт Саха сирин буойуннарыгар анаммыт өйдөбүнньүк Мамаай томторугар туруорулунна, Новгород уонна Смоленскай уобаластарыгар мемориаллар аhылыннылар. Салгыы 2030 сылга диэри Аҕа дойду Улуу сэриитигэр Саха сирин буойуннара сырдык тыыннара быстыбыт эрэгийиэннэригэр өйдөбүнньүктэр туруоруллуохтара.
Өрөспүүбүлүкэ парламена сэрии уонна тыыл бэтэрээннэригэр, огдооболоругар, Ленинград блокадатын олохтоохторугар, сэрии кэмин оҕолоругар туhуламмыт эбии өйөбүл миэрэлэри кэҥэтиигэ улахан болҕомтотун уурар. Норуот дьокутааттара аҕа көлүөнэ дьон олоҕун тупсарар саҕалааhыннары мэлдьи өйүүллэр, Аҕа дойду Улуу сэриитигэр аналлаах дьаhаллары көҕүлүүллэр. Биир сүрүн сорукпутунан үүнэр көлүөнэни патриотическай тыыҥҥа иитии, история чахчыларын харыстааhын буолар. Былаас уорганнара уонна уопсастыба бииргэ үлэлэрин түмүгэр Саха сиригэр аҕа көлүөнэ хорсун быһыытыгар ытыктабыл уонна патриотическай үгэстэри утумнааһын эйгэтэ үөскүүр.
Билигин Саха сиригэр 7 Аҕа дойду Улуу сэриитин бэтэрээнэ олорор. Хас биирдиилэрэ дойдуга муҥура суох таптал, бэринии, дьоруойдуу быhыы кэрэhиттэрэ. Кинилэр истэригэр Саха Өрөспүүбүлүкэтин Ил Түмэнин бэтэрээнэ, Саха АССР Үрдүкү Сэбиэтин VIII, IX, X ыҥырыыларын дьокутаата, Аҕа дойду сэриитин I истиэпэннээх уонна Үлэ Кыhыл Знамя уордьаннар кавалердара, Саха АССР норуотун хаhаайыстыбатын үтүөлээх үлэhитэ, Саха Өрөспүүбүлүкэтин уонна Бүлүү улууhун ытык киhитэ Кирилл Егорович Павлов баар. Улуу Кыайыы күнүгэр ытыктабыллаах бэтэрээннэрбитигэр уонна кинилэр дьиэ кэргэннэригэр чөл туругу, уhун дьоллоох олоҕу, этэҥҥэ буолууну баҕарабын.
Күндү доҕоттор! Аҕа көлүөнэ дьоммут турууласпыт, көмүскээбит тапталлаах дойдубут мэлдьи сайда-чэчирии турдун. Кыайыы күнүнэн!
Алексей Еремеев, Саха Өрөспүүбүлүкэтин
Ил Түмэнин Бэрэссэдээтэлэ
-
0
-
0
-
0
-
0
-
0
-
0
