Үс көлүөнэ этээччилэр: аҕа саастаах, ыччат уонна оскуола үөрэнээччилэрэ күнүс 1 ч. 15 мүнүүтэттэн 17 ч. 30 мүнүүтэҕэ диэри биир да тохтобула суох Оһуокай түһүлгэтэ буолла. Үтүөлээх этээччи Мария Иванова үөрэнээччилэрэ Оля Мухоплева, Уля Егорова, Витя Васильев, култуура кэллиэһин үһүс куурсун устудьуннара кэлэн бүтүөр диэри көхтөөхтүк кытыннылар. СР култууратын үтүөлээх үлэһитэ Ирина Васильевна Абрамова уонна мин саҕаланыаҕыттан бүтүөр диэри атахпытыгар туран Оһуокайбытын ыыттыбыт диэн билиилээх оһуокайдьыт Марта Николаева  Саха сиригэр бэлиэтиир.

Оһуокай түмсүүтүн бэрэссэдээтэлин солбуйааччы Александр Тарскай тиэхиньиичэскэй өттүгэр, аппаратура үлэлииригэр куорат мээрийэтин тиэхиньиичэскэй сулууспатын кытары үлэлэстэ. Быйыл эбиэт кэнниттэн ардах да түстэр, түһүлгэ тохтообото, элбэх дьону хабан олус тэрээһиннээхтик барда. Аар Дархан этээччибит Семен Ильич Черноградскай доруобуйата төһө да алларыйдар,аатырбыт күрэсчит күүстээх санаатын ылынан кэлэн, киэҥ түһүлгэни төрүттээтэ. Оһуокай этээччилэртэн Аграфена Герасимова аҕата Ржевка, мин аҕам Берлиҥҥэ тиийэ сэриилэһэн, кыайыы көтөллөнөн кэлэн, аҕаларбытыгар махтанан эттибит. Мэлдьи кыттар ыччаттарбыт Сергей Алексеев, Эдуард Чоросов улахан түһүлгэни таһааран дьон сүргэтин көтөхтүлэр. Саамай бүтэһик түмүк оһуокайы таһаарбыт ХИФУ төрдүс куурсун устудьуона Сайыына Шамаева этэригэр бэл ардахпыт тохтоон, дьон санаатын көтөхтө.

Онон Кыайыы 81 сылыгар аналлаах Кыайыы Оһуокайа кыайыыны түстээн, Дьокуускай куорат үрдүнэн куйаарга дуорайда.

Хаартыска Марта Николаева тиксэриитинэн