Ол туһунан өрөспүүбүлүкэҕэ маассабай успуорду сайыннарыыга Ил Түмэҥҥэ ыытыллыбыт төгүрүк остуолга ыччакка, физическэй култуураҕа уонна успуорка сис кэмитиэт бэрэссэдээтэлэ Георгий Балакшин билиһиннэрдэ. Төгүрүк остуолга норуот дьокутааттара, СӨ Бырабыыталыстыбатын бэрэссэдээтэлин солбуйааччы Сергей Местников, үөрэх, успуорт, ыччат бэлиитикэтин министиэристибэтин бэрэстэбиитэллэрэ, успуорт федерацияларын салайааччылара, бэтэрээннэр кытыннылар. Мунньаҕы Георгий Балакшин ыытта.
Сүрүн дакылааты СӨ физичэскэй култуураҕа уонна успуорка миниистирэ Леонид Спиридонов оҥордо. Нэһилиэнньэ успуордунан дьарыктанарын туһугар кэлиҥҥи кэмҥэ улахан баараҕай тутуулар ыытылыннылар, успуорт уораҕайдара дьэндэйэн таҕыстылар. 2007-2025 сс. өрөспүүбүлүкэҕэ 6,36 млрд. солк. федеральнай киин үбүлээһининэн успуорт 60 эбийиэгэ тутулунна. Онтон саамай улахаттарын ааттаталаатахха, Дьокуускай куоракка «Триумф» успуорт киинэ, «Чолбон» бассейн, «Дохсун» футболлуур манеж, «Модун». «Демография» национальнай бырайыак иитинэн Ньурба улууһугар Антоновкаҕа успуорт саалата, Жатайга бассейн, Аллараа Бэстээххэ, Бороҕоҥҥо успуорт киинэ, Бэрдьигэстээххэ успуорт саалата, Дьокуускайга бүрүөһүннээх каток о.д.а. тутулуннулар.
Сыл ахсын 600-чэкэ успуорт маассабай тэрээһиннэрэ ыытыллаллар, онно 300 тыһ. тахса киһи кыттар. Дьон маассабайдык өрөспүүбүлүкэтээҕи оонньууларга, спартакиадаларга, «Азия оҕолоро» аан дойдутааҕы успуорт оонньууларыгар, өрөспүүбүлүкэ норуоттарын успуорка оонньууларыгар, «Манчаары оонньууларыгар», «Дьулуур» успуорт адаптивнай көрүҥүгэр спартакиадаҕа о.д.а. кытталлар. Бу күрэхтэһиилэргэ бэлэмнэнии аҥаардас успуорт эбийиэктэрин тутуунан муҥурдаммат, суолу-ииһи оҥороллор, искибиэрдэри, болуоссаттары тупсараллар.
Хаартыска ЯСИА.
-
0
-
0
-
0
-
0
-
0
-
0
