Бу күн анал өйдөбүннүк тэрээһиҥҥэ АБДь кыттыылаахтарын кэргэттэрэ, ийэлэрэ, аҕалара муһуннулар. Тэрээһин Арассыыйа уонна Саха Өрөспүүбүлүкэтин гиимнэриттэн саҕаланна. Ол кэннэ  «Анал байыаннай дьайыы буойуннарын Өйдөбүнньүгэ» Саха Сиринээҕи  сойууһун үлэтин, сыалын-соругун туһунан бэрэссэдээтэл Жанна Валентиновна Грекова бэйэтин тыл этиитигэр билиһиннэрдэ. Кини Ийэ дойдуларын туһугар олохторун толук уурбут буойуннар чугас дьонноругар сүгүрүйэрин биллэрдэ, махтал тылларын анаата.

Тэрээһин кэмигэр  сойуус иһинэн тэриллибит ансаамбыл уонна оҕолор бэйэлэрин нүөмэрдэрин толордулар. Ону тэҥэ «Биһиги бииргэ сылдьабыт» уонна «Өйдөбүнньүк Кынаттара» кэлэктииптэр «Аанньал харахтаах Буойун»ырыаны бастакытын ыллаан иһитиннэрдилэр уонна уус-уран нүөмэри көрдөрдүлэр.

Салгыы АБДь-га өлбүт байыастары кэриэстиир бэһис видео эрээти көрдөрбүттэрин, сүтүктээх дьон бары даҕаны соҥуоран олорон, кэриэстээн ахтан-санаан ыллыбыт.

Анал өйдөбүнньүк тэрээһиҥҥэ Саха Өрөспүүбүлүкэтин Судаарыстыбаннай Мунньаҕын ( Ил Түмэн) бэрэссэдээтэлин солбуйааччы,  байыаннай сулууспалаахтар, бойобуой дьайыылар бэтэрээннэр дьыалаларыгар, патриотическай иитии уонна уопсастыбаннай тэрилтэлэр боппуруостарыгар сис кэмитиэт бэрэссэдээтэлэ, ону тэҥэ АБДь-га өлбүт буойуннар дьиэ кэргэттэрин сойууһун актыыбын чилиэнэ Александр Григорьевич Подголов кыттан, Аҕа дойдуну көмүскээччилэр кэргэттэригэр, ийэлэригэр уонна аҕаларыгар мэтээллэри, дастабырыанньалары туттарда.

Тэрээһин биир дьыалабыай чааһынан «Синергия» кэллиэһин дириэктэрэ Семен Семенов, дириэктэри солбуйааччы Анастасия Сидорова уонна сойуус бэрэссэдээтэлэ Жанна Грекова сөбүлэҥҥэ илии баттааһыннара буолла.

Бу күн Иеромонах Гермоген (Рубцов) Дьокуускай куорат бары сибэтиэйдэрин Таҥара дьиэтин настоятела анал байыаннай дьайыы кыттыылаахтарын дьиэ кэргэттэригэр анаан сулууспа оҥордо.

Түмүккэ ийэлэр, оҕолор, бииргэ төрөөбүттэр сүтэрбит чугас дьоннорун кэриэстээн хоһооннору аахтылар.

Ньургуйаана Скрябина

Хаартыска ааптар тиксэриитинэн