Ил Түмэн сир сыһыаннаһыыларыгар, айылҕа баайыгар уонна экология сис кэмитиэтин бэрэссэдээтэлэ Андрей Находкин «Экология» национальнай бырайыак көмөтүнэн Хаҥалас улууһугар «Өлүөнэ остуолбалара”, Аллайыаха улууһугар “Кыталык” национальнай паарка, Аллараа Халымаҕа «Эһэ арыылара» заповедник, Булуҥҥа Новосибирскай арыылара заказник тэриллибиин туһунан билиһиннэрдэ. Ураты харыстанар сирдэри 2032, барыллаан 2050 сылга диэри сайыннарарга былаан оҥоһуллубут.
2026 с. кулун тутар 18 күнүгэр ураты харыстанар сирдэр туһунан федеральнай сокуоҥҥа уларытыылары киллэрэргэ сокуон барылын бастакы ааҕыыга ылыммыттар. Ол чэрчитинэн ураты харыстанар сирдэр кыраныыссалара уларыйыахтаах. Онон улуустар баһылыктарыгар, оройуон сэбиэтин бэрэссэдээтэллэригэр, норуот дьокутааттарыгар этиилэри хомуйарга сокуон барылын ыыппыттар.
Маны таһынан, сокуон барылын СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэ уопсастыбаннай сэбиэтигэр ырытыспыттар. Бары киирбит этиилэри түмэн, сис кэмитиэт Судаарыстыбаннай Дуума профильнай кэмитиэтигэр ыыппыт. Муус устар ыйга Андрей Находкин Москубаҕа бара сылдьан Судаарыстыбаннай Дуумаҕа экология, айылҕа баайыгар уонна тулалыыр айылҕаны харыстыырга кэмитиэт бэрэссэдээтэлин Андрей Кобылкины кытта көрсөн кэпсэппит.
«Ураты харыстанар сирдэр кыраныыссаларын уларытарга федеральнай таһымҥа этиллэр мэхэньиисим сөптөөх киритиэрийэ уона толуйар дьаһала суох эрэгийиэннээҕи уонна олохтоох эбийиэктэри таһааран кэбиһэрэ хотугу айылҕаҕа кутталы үөскэтэр. Социальнай-экэнэмиичэскэй сайдыы интэриэһэ национальнай баайбытын харыстыырбытын аҥаардастыы баһыйыа суохтаах, икки өрүтү көрүөхтээхпит. Ол иһин көннөрү отчуоту эрэ истибэккэ, заповеднай айылҕабытын салайарга саҥа таһымҥа тахсарга этиилэр киириэхтээхтэр», — диэтэ Андрей Находкин.
Хаартыска Мария Васильева, ЯСИА.
-
0
-
0
-
0
-
0
-
0
-
0
