Кини инники былааннары билиһиннэрэригэр айылҕа баайын хостооччулар интэриэстэрэ күүһүрэн, ураты харыстанар сирдэр категорияларын, кыраныыссаларын, харабыл эрэсиимин чопчулааһын ыытылларын туһунан бэлиэтээтэ. Ону таһынан, ытык кэрэ сирдэри сайыннарыы кэнсиэпсийэтин саҥа бырайыагын бигэргэтэргэ ыҥырда.
«Өлүөнэ остуолбалара» национальнай паарка дириэктэрэ Аркадий Семенов 2025 с. пааркаҕа саамай элбэх 56806 киһи сылдьыбытын туһунан иһитиннэрдэ. 2026 с. тохсунньутугар-муус устарга 25743 киһи кэлэн сынньанан барбыт. Кини инникитин өрөспүүбүлүкэ хас биирдии олохтооҕо национальнай пааркаҕа босхо сылдьыахтаах, айылҕаны кытта алтыһыахтаах диэн өрөспүүбүлүкэ бүддьүөтүттэн субсидия көрөргө этии киллэрдэ.
Туризмы сайыннарарга национальнай пааркаҕа инфраструктураны тупсардылар, үөһэттэн көрөр былаһааккалары, очуостарга тахсарга саҥа суолу, ыскамыайкалары оҥордулар, банаардары туруордулар.
Иккис түһүмэх быһыытынан, 2027-2028 сс. кафе павильонун, барбекю оҥосторго былаһаакка, сынньанар сири, ийэ уонна оҕо хоһун оҥоруохтара, көҕөрдүүнү тупсарарга маһы олордуохтара, Wi-Fi сибээһинэн, видеонан кэтээн көрүүнэн хааччыйыахтара. Буотама төрдүгэр эко уонна этнотуризмы сайыннарыахтара, дьон түһэр дьиэлэрин тутуохтара, Дьокуускайга кембрий түмэлин тэрийиэхтэрэ.
«Өлүөнэ остуолбалара» култуура көҕүлээһинигэр Бэрэсидьиэн пуондатын күрэҕэр кыайан, тыатааҕы популяциятын уонна сэдэх сүтэн эрэр үүнээйилэри харыстыырга икки бырайыак 7,6 мөл. солк. тахса суумалаах гырааны ылан, ону быйыл олоххо киллэриэхтэрэ.
Хаартыска Мария Васильева, ЯСИА.
-
0
-
0
-
0
-
0
-
0
-
0
