Антонина Григорьева биһиги өрөспүүбүлэкэбит харыстанар сирин кээмэйинэн Арассыыйаҕа инники күөҥҥэ сылдьарын бэлиэтээн туран, заповедниктар бырааптара ситэ биллибэтиттэн долгуйарын эттэ. Ураты харыстанар сирдэр туһунан федеральнай сокуоҥҥа уларытыылары киллэрэргэ сокуон барылын бастакы ааҕыыга ылыммыттар, оччотугар заповедниктарбыт кыраныыссалара уларыйыахтаах. Антонина Григорьева дакылааччыттар бу боппуруоска туох санаалаахтарын ыйыталаста уонна «Өлүөнэ остуолбалара» национальнай паарка билим тэрилтэлэрин кытта сөбүлэһии түһэрсэн хайдах үлэлиирин сураста.
Рустам Хон өрөспүүбүлүкэ бүддьүөтүн дохуоттаах чааһын бырамыысыланнас толорорун, биир өттүнэн кэнэҕэс көлүөнэҕэ айылҕабытын алдьаппакка хаалларыахтаахпытын санатта. Саха Сиригэр хаһаайыстыбаннай, рекрационнай үлэни ыытары, ол иһигэр геологтар чинчийиилэрин бобор чуумпу сирдэр баалларын эттэ. Оннук учаастагы ураты харыстанар сирдэргэ оҥороллорун бэлиэтээтэ.
Аркадий Семенов федеральнай суолталаах айылҕаны харыстыыр тэрилтэ билимҥэ Арассыыйа академиятын кытта сөбүлэһиилээхтэрин, ол иһин өрөспүүбүлүкэҕэ баар бары үнүстүүттэри кытта үлэлэһэллэрин туһунан хоруйдаата.
Норуот дьокутаата Александр Корякин Амма өрүс 6 улуус сиринэн устарын, эбэ үөһээ өттүгэр айылҕа баайын хостооччулар кэлбиттэриттэн нэһилиэнньэ дьаахханарын, Амма ыраас уутун, кэрэ айылҕатын харыстыырга туох дьаһалы ылыахха сөбүн туһунан интэриэһиргээтэ.
Рустам Хон Өлүөнэ, Амма өрүһү бүтүннүү сабар сатамматын, эрэсиими эрэ күүһүрдүөххэ сөбүн, сир баайын хостооччулар үлэлэрин экология министиэристибэтэ хонтуруоллуурун туһунан хардарда.
Төгүрүк остуол түмүгэр дьокутааттар резолюция бырайыагар этиилэрин киллэрдилэр. Ил Түмэн вице-спикерэ Юрий Николаев айылҕа баайын хостооһун түмүгэр уубут, салгыммыт киртийэрин иһин тулалыыр эйгэҕэ тахсар хоромньуну кыччатыах тустаахпытын, хотугу айылҕа уйанын, чөлүгэр кыайан түспэтин санатта. Эппиэтинэстээх хампаанньалар сир баайын хостуурга, ону таҥастыырга тулалыыр эйгэҕэ куттала суох аныгы технологияны туттуохтаахтарын, сокуону тутуһуохтаахтарын бэлиэтээтэ.
Сис кэмитиэт бэрэссэдээтэлэ Андрей Находкин айылҕа пааркаларыгар, пааматынньыктарыгар харыстанар сирдэр тэриллиэхтээхтэрин, 34 ураты харыстанар сирдэр кыраныыссаларын чопчулааһын түмүктэниэхтээҕин туһунан иһитиннэрдэ. 1096223-8 №-дээх федеральнай сокуон барылыгар чуолаан Аартыкаҕа заповеднай сир кыччыа суохтааҕын, ол иһин эрэгийиэннэри кытта сүбэлэһии, публичнай истии баар буолуохтааҕын туруорсалларын тириэртэ. Өскөтүн ураты харыстанар сирдэр кыраныыссалара уларыйдаҕына, экология эспэртиисэтэ ыытыллыахтааҕын, итиэннэ толуйуу дьаһала наадатын эттэ.
Василий Кононов хаартыскаҕа түһэриитэ.
-
0
-
0
-
0
-
0
-
0
-
0
