СӨ физичэскэй култуураҕа уонна успуорка миниистирэ Леонид Спиридонов этэринэн, хоту улуустар ыраах сыталлар, тырааныспар сылдьара уустук, төлөбүрэ ыарахан, миэстэтигэр успуордунан дьарыктыыр, дьону көҕүлүүр үлэһиттэр тиийбэттэр. Улуустар икки ардыларыгар үбүлээһин улаханнык араастаһар, 200 тыһ. солк. саҕалаан, сылга уонча мөлүйүөҥҥэ тиийэр, Аартыка улуустара ситэ үбүлэммэккэ хаалаллар.
Итиниэхэ олоҕуран, миниистир улуустарга успуорт управлениетын реформалаан баран туһунан уорганы тэрийэргэ этии киллэрдэ. Ону таһынан, успуорт саалаларын тутар, үлэһиттэргэ абонемены төлүүр тэрилтэлэргэ барыыстан тутуллар нолуокка, хампаанньаларга инвестиционнай вычет оҥорорго эрэгийиэн сокуонугар уларытыылары киллэрэр наадалааҕын бэлиэтээтэ. Салгыы кэлэктиип дуогабарыгар корпоративнай успуорт ирдэбилэ оҥоһуллуохтааҕын, успуорт, физическэй култуура үлэһиттэрин чэпчэтиилээх Уһук Илиҥҥи ипэтиэкэҕэ киллэрэргэ этиилэрин тириэртэ. Оскуола успуорт эбийиэктэригэр нэһилиэнньэни эмиэ киллэрэр наадалааҕын ыйда, итиэннэ успуорт үлэһиттэрин ноҕоруускаларын нуормаҕа киллэрэн, өрөбүлгэ уонна бырааһынньыкка эбии төлөбүр көрүллүөхтээҕин туруоруста.
Василий Кононов хаартыскаҕа түһэриитэ.
-
0
-
0
-
0
-
0
-
0
-
0
