Физичэскэй култуура, маассабай успуорт уонна үрдүкү ситиһиилээх успуорт тус-туһунан арахсарын, маассабай успуорка кулууптар сөп түбэһэллэрин бэлиэтээтэ. Оскуолаҕа илиҥҥи дойдулар холобурдарынан тайчи, йога, цигун, ушу көрүҥүн сайыннарарга, үөрэх кыһаларыгар тириэнньэрдэри ыҥырарга, эдэр дьону үөрэттэрэ ыытарга этии киллэрдэ.
Дакылааччыттары истэн баран норуот дьокутааттара, төгүрүк остуол кыттыылаахтара ыйытыктары биэрдилэр, маассабай успуорду сайыннарарга, нэһилиэнньэни чэбдигирдэргэ санааларын үллэһиннилэр.
Екатерина Никитина, 1998-2003 сс. дьахталлартан соҕотох Дьокуускай куорат бэрэстэбиитэллээх уорганын салайааччыта, Ил Түмэн үһүс ыҥырыытын бэрэссэдээтэлин солбуйааччы, 1998-2008 сс. хайыһар федерациятын бэрэсидьиэнэ, билигин даҕаны хайыһары бырахпакка дьарыктанар. Кини идэтийбит уонна маассабай успуорка төһө үп көрүллэрин ыйыталаста.
СӨ физичэскэй култуураҕа уонна успуорка миниистирэ Леонид Спиридонов этэринэн, эбийиэктэри көрүү-истии ороскуотун аахпатахха, 2025 с. үрдүкү ситиһиилээх успуорка 30 мөл., маассабай успуорка 9-10 мөл. солк. ыыппыттар, оттон быйыл бары бырагыраамаларга үбүлээһин көрүллүбэтэх.
Андрей Находкин улуустарга аккредитацияламматах федерациялар, футболлуур хонууну бэйэлэрэ оҥостубут энтузиаст уопсастыбанньыктар, маассабай успуорду тэрийээччилэр төһө элбэхтэрин туһунан туоһуласта.
СӨ физичэскэй култуураҕа уонна успуорка миниистирэ Леонид Спиридонов улуустар отчуоттарыгар энтузиастар, эбэтэр бүддьүөт харчытыгар тутуллубут диэн араарбаттарын, өрөспүүбүлүкэҕэ 80-ча федерация баарын, онтон 65-һэ аккредитациялааҕын туһунан хардарда. Улуус таһымыгар хас федерация баара ааҕыллыбатаҕын бэлиэтээтэ. Онуоха Андрей Находкин аҥаардас Мэҥэ Хаҥалас улууһугар 27 федерация баарын иһитиннэрдэ, атын улуустарга хас федерация үлэлиирин эмиэ ааҕарга ыҥырда. 35 улууһу аахтахха, көрдөрүү лаппа тупсарын эттэ. Кини уопсастыбанньыктар маассабай успуорду көҕүлүүргэ үлэлэһэллэрин, кылааттарын киллэрэллэрин умнар сатамматын санатта.
Төгүрүк остуол түмүгүнэн бары этиилэри түмэн, маассабай успуорду сайыннарарга туһаайыахтара. Киэһээ өттүгэр уонна өрөбүлгэ муниципальнай успуорт эбийиэктэригэр нэһилиэнньэ бары араҥатыгар чэпчэтиини, эбэтэр босхо киириини хааччыйарга, оскуолаларга сарсыардааҥҥы сэрээккэни сөргүтэргэ, хас биирдии нэһилиэккэ култуура, успуорт эбийиэктэригэр «Көхтөөх уһун үйэлэнии» кулууптарын арыйарга этиилэр киирдилэр.
Василий Кононов хаартыскаҕа түһэриитэ.
-
0
-
0
-
0
-
0
-
0
-
0
