Көмүөл алын кирбиитэ Өлүөхүмэ Саныйахтааҕар кэллэ, манна уу таһыма 1071 см тиийдэ, кутталлаах таһыма 1340 см. Ленскэй куоратын аннынан уу таһыма 791 см, кутталлаах таһыма 1760 см. Өлүөхүмэ куоратын муус хойуутук устар, уу таһыма 798 см, кутталлаах таһыма 1060 см. Көмүөл кутуруга Ленскэй куоракка кэллэ, уу түһэр. Көмүөл уһуна 327 км, суукка устата 66 км барда. Покровскай куорат аннынан муус хамсааһына ыам ыйын 14-15 күннэригэр сабаҕаланар, Дьокуускайга ыам ыйын 16-17 күннэригэр күүтүллэр.
Амма өрүс төрдүгэр тиийэн Алдаҥҥа киирдэ, Бүлүү өрүс алын кирбиитэ Бүлүү куоратын аһарда, бу күннэргэ Кэбээйи улууһугар киирэрэ сабаҕаланар. Алдан өрүс көмүөлэ үс учаастагынан бара туран, ыам ыйын 14 күнүгэр холбосто. Билигин алын кирбиитэ Кириэс Халдьаайыга кэллэ, уутаһыма 509 см, кутталлаах таһыма 1088 см. Көмүөл кутуруга Алдан улууһун Чагдатыгар хойуутук барар, уу түһэр. Көмүөл суукка устата 82 км барда.
Бу күннэргэ СӨ бырабыыталастыбатын бэрэссэдээтэлин бастакы солбуйааччы Дмитрий Садовников салалталаах бөлөх Ленскэй оройуонугар халаан уутун этэҥҥэ аһардыыга уонна ойуур баһаардарын хонтуруоллааһыҥҥа үлэлээбитин бэлиэтиэххэ сөп. Ыам ыйын 13 күнүгэр Саха Сиригэр Хабаровскайтан биир бөртөлүөт, 20 быыһааччы кэллилэр, кинилэр ыксаллаах быһыы-майгы тахсар түбэлтэтигэр көтөргө бэлэмнэр. Билигин анал үөрэхтээх исписэлиистэр Нам улууһун Граф биэрэгэр уонна Остуолбатыгар үлэлииллэр.
-
1
-
0
-
0
-
0
-
0
-
0
