Кангаласс анныгар уу таһыма 1054 см, кутталлаах таһыма 1100 см. Дьокуускайга уу таһыма 719 см, кутталлаах таһыма 990 см. Сангаар аннынан ырбыыланна, уу эбиллэр.
Көмүөл кутуруга Покровскайга кэллэ, уу таһыма 813 см, уу түһэр. Көмүөл уһуна 358 км, суукка устата 43 км барда. Өлүөнэ көмүөлэ Нам-Батамай учаастагар тиийиитэ бу күннэргэ сабаҕаланар. Граф биэрэгэр муус барыыта саҕаланан эрэр, уу таһыма үрдүүр, муҥутаан үрдээһинэ 940-960 см диэри сабаҕаланар. Манна харыы үөскээтэҕинэ уу таһыма 980-1080 см диэри үрдүүрэ күүтүллэр, ходуһаҕа, намыһах сирдэргэ тахсыаҕа.
Алдан өрүс көмүөлэ алын кирбиитэ билигин Уус Алданынан барар, алын кирбиитэ Дыгдаалтан 20 км. ллараа бэлиэтэнэр, уу таһыма 949 см, кутталлаах таһыма 1000 см. Көмүөл суукка устата хамсаабата, уһуна 61 км. Алдан Өлүөнэҕэ киириитэ бэлиэтэнэр.
Бүлүү өрүһүн мууһа Кэбээйи улууһунан барар. Алын кирбиитэ Өлүөнэҕэ таҕыста.
Халыма өрүһүн баһыгар, Магадаан уобалаһын сиригэр-уотугар муус алдьаныыта бэлиэтэнэр. Зырянка аннынан муус барыытын ыам ыйын 19-21 күннэригэр күүтүллэр, Орто Халыма аннынан ыам ыйын 23-24 күннэригэр. Халыма өрүс уҥа салаата Березовка өрүс көмүөлэ Березовка бөһүөлэгин аннынан бэлиэтэнэр, уу таһыма 873 см (кутталлаах таһыма 1000 см).
Дьааҥы өрүһүгэр уу эбиллэр, Сартаҥ, Дулҕалаах, Адыыча өрүстэригэр кыралаан ырбыыланар, Верхоянскай аннынан муус барыыта ыам ыйын 21-24 күннэригэр сабаҕаланар.
Ыам ыйын 19 күнүгэр Арассыыйа ЫБММ бөртөлүөтүнэн Хаҥалас, Дьокуускай, Нам учаастагынан кэтээн көрөр көтүү оҥоһуллуоҕа, дэлби тэптэриигэ туттуллар бэсэстибиэлэр тиэрдиллиэхтэрэ. Ааспыт сууккаҕа Өлүөнэ өрүһүгэр бөртөлүөтүнэн кэтээн көрүү кэмигэр Нам улууһун учаастагар харыы үөскээбит сирдэригэр 1,8 туонналаах 2 дэлби тэптэрии оҥоһулунна.
-
0
-
0
-
0
-
0
-
0
-
0
