Онтон бу үгэс хантан кэлбитий диэтэххэ, православнай иэҕэллээх христианнар бүгүн сибэтиэй Николай Чудотворец, Ньукуолун Таҥара күнүн бэлиэтииллэр. Николай Чудотворец аата этэрин курдук, Таҥараҕа итэҕэйэр дьоҥҥо куруук көмөлөһөр, киһи сөҕүөх дьиктини оҥорор, дьон баҕа санаатын толорор күүстээх. Ньукуолун күнүн сылга иккитэ бэлиэтииллэр, ахсынньы 19 күнүгэр уонна ыам ыйын 22 күнүгэр. Кыһыҥҥы Ньукуола тымныыны, сайыҥҥы сылааһы аҕалар.
Сибэтиэй Ньукуола III-IV үйэлэр кирбиилэригэр Ликия түөлбэтин Мира куоратыгар (билиҥҥи Турция сиригэр) олорон ааспыта. Билигин даҕаны Турцияҕа сырыттахха, Кемертан чугас былыргы Мира куоракка баар Сибэтиэй Ньукуола храмыгар туристары сырытыннараллар. Онно саркофаг иһигэр Сибэтиэй көмүс уҥуоҕа хараллыбытын кэлин Италияҕа көһөрбүттэрэ. Таҥараны итэҕэйэр дьон аан дойду бары уһугуттан манна кэлэн Сибэтиэй олорбут, көмүс уҥуоҕа хараллыбыт сиригэр көрдөһөллөр. Кекова арыы аттынан суудунанан устан истэххэ, муора анныгар тимирбит түҥ былыргы куорат омооно көстөр.
Оттон саха дьоно унньуктаах уһун кыһыны туораан, күөх сирэмҥэ үктэнэн, самаан сайыны көрсөр үөрүүлээх күммүт. Кэрэ аҥаардар алаадьы, саламаат, кус минэ астыыллар, ол иннинэ дьиэлэрин сууйаллар-сотоллор, туттубат эргэрбит малларыттан босхолоноллор, ыраастаналлар.
Үтүө үгэс быһыытынан, дьиэ кэргэнинэн айылҕаҕа тахсан, сибиэһэй салгыҥҥа сынньаналлар, эбэҕэ киирэн, арыылаах алаадьы уураллар, тымныы тыйыс кыһыны этэҥҥэ туораабыттарыгар махтаналлар.
Ааптар хаартыскаҕа түһэриитэ.
-
0
-
0
-
0
-
0
-
0
-
0
