Нуучча тылын уонна РФ норуоттарын тылларын өйүүргэ судаарыстыбаннай бэлиитикэни ыытарга дойду Бэрэсидьиэнин иһинэн Сэбиэт «Арассыыйа Федерациятыгар тыллар туһунан» сокуон барылын бэлэмнээтэ. Сокуон барыла Арассыыйа норуоттарын тылларын судаарыстыбаннай реестрин оҥорон, статустарын чопчулаан, РФ норуоттарын тылларын, судаарыстыбаннай тыл туһунан сокуону сааһылыахтаах.
Александр Жирков киирии тылыгар оробуочай бөлөх сэттис мунньаҕар судаарыстыбаннай тыл уонна өрөспүүбүлүкэ норуоттарын тыла көрүллэрин туһунан эттэ. Мунньахха «Арассыыйа Федерациятыгар тыллар туһунан» сокуон барылыгар бэлэмнэнии боппуруостарын уонна саха тылын учууталларын үһүс сийиэһигэр уонна иккис пуорумҥа киирэр матырыйааллары ырытыстылар.
Ил Дархан уонна СӨ Бырабыыталыстыбатын дьаһалтатын иһинэн тылы сайыннарыыга управление салайааччыта Римма Жиркова этэринэн, өрөспүүбүлүкэ судаарыстыбаннай тылларын нуорматын тылдьыттарын оҥорон, РФ Бырабыыталыстыбатын иһинэн координационнай уоргаҥҥа бигэргэтиэхтээхтэр.
«Биһиги өрөспүүбүлүкэбит судаарыстыбаннай тыл тылдьытын туһунан, нуучча тылынан уонна өрөспүүбүлүкэ норуоттарын тылларынан сиһилии иһитиннэриини бэлэмниэхтээх. Билим уонна үрдүк үөрэх министиэристибэтигэр морфологическай, лексикографическай, синхроническай, толковай, орфографическай, фразеологическай тылдьыттары ыытыахтаахпыт. Ити этиллибит тылдьыттар бары РФ Барыбыыталыстыбата оҥорбут бэрээдэгин быһыытынан оҥоһуллуохтаахтар”, — диэтэ Римма Жиркова.
Маннык киэҥ хабааннаах үлэни 2027 с. саҕалаан баран 2032 с. түмүктүөхтээхтэр. Александр Жирков: «РФ Төрүт Сокуонун быһыытынан, өрөспүүбүлүкэ судаарыстыбаннай тылы бэйэтэ олохтуур бырааптаах уонна хааччыйыы эйгэтигэр тылы туттуу Арассыыйа Федерациятын сокуонунан уонна РФ субъектарын сокуоннарынан быһаарыллыахтаах. Биһиги сорукпут ити икки тиэмэни холбуу тутааһын. Бастакытынан, тылдьыты оҥоруохтаахпыт, итиниэхэ федеральнай үбүлээһин көрүллүөхтээх, онон биллэн турар, көдьүүстээх үлэ тахсыаҕа. Оттон ити сурукка ыйыллар бигэргэтии бэрээдэгэ, ирдэбили оҥорооһун Төрүт Сокуону утарар», — диэн эттэ парламент бастакы вице-спикерэ.
Салгыы мунньах кыттыылаахтара санааларын үллэһиннилэр, туох итэҕэс-быһаҕас баарын уонна этиилэрин эттилэр. Маны олоххо киллэрэргэ сокуон барылыгар үп-экэниэмикэ өттүттэн сиһилии ырытыы, дойду өрөспүүбүлүкэлэрин судаарыстыбаннай тылларын бигэргэтэргэ РФ өрөспүүбүлүкэлэрэ ороскуоттарын сыаналааһын наадата этилиннэ.
Тыл кэскилин туһунан бэйэлэрин санааларын «Саха Конгресс» уопсастыбаннай түмсүү бэрэссэдээтэлэ Иван Шамаев, ХИФУ Бэрэсидьиэнэ Евгения Михайлова, «Ийэ тыл кэскилэ» өрөспүүбүлүкэээҕи уопсастыбаннай хамсааһын салайааччыта Вилюяна Никитина эттилэр.
Иккис уонна үһүс боппуруоһунан мунньах кыттыылаахтара саха тылын, литэрэтиирэтин, култууратын учууталларын III өрөспүүбүлүкэтээҕи сийиэһин резолюциятын уонна «Ийэ тыл» II өрөспүүбүлүкэтээҕи пуорум түмүк докумуонун дьүүллэстилэр. Ол туһунан Ил Түмэн пресс-сулууспата иһитиннэрэр.
Василий Кононов хаартыскаҕа түһэриитэ.
-
0
-
0
-
0
-
0
-
0
-
0
