Оскуола дириэктэрэ, Дьокуускай куорат Дууматын үөрэххэ, култуураҕа уонна оҕо сааска сис кэмитиэтин бэрэссэдээтэлэ Айаан Ильич Васильев үөрэххэ киирии көрдөрүүтүн, аныгы оҕолор үксүн ханнык хайысханы талалларын туһунан кэпсээтэ.
«Выпускниктар дойду киин үөрэх кыһаларыгар киирэр көрдөрүүлэринэн биһиги оскуолабыт РАЕХ риэйтинин быһыытынан, өрөспүүбүлүкэ, Уһук Илин үрдүнэн 20 бастыҥ оскуола ахсааныгар киирэр. Итинэн биһиги олус үөрэбит уонна киэн туттабыт. Оҕолор билигин үксүн дойдубут киин куораттарын инженернай-тиэхиньиичэскэй хайысхалаах үөрэҕин кыһаларыгар киирэллэр, дизайн, айти салаатын талаллар. Ону таһынан, ХИФУ-га юридическай бакылтыакка, биология, физика хайысхатынан үөрэнэллэр.
Тус бэйэм оскуоланы 1989 с. бүтэрбитим, биһиги саҕана үгүс үөрэнээччилэр юридическай бакылтыакка, Үп-экэниэмикэ үнүстүүтүгэр киирэ сатыыллара. Билигин оннук муода суох, төрөппүттэр оҕолорун инженернай, тиэхиньиичэскэй үөрэххэ киллэрэ сатыыллар. Биллэн турар, ону ситиһэр кэккэ уустуктардаах, математиканы, физиканы үрдүк таһымҥа билэр оҕо аҕыйах, биридимиэт даҕаны судургута суох.
Дойду престижнэй үөрэх кыһаларыгар киирии түмүгүнэн куоракка саамай дьоҕурдаах оҕолору түмэн үөрэтэр В.П. Ларионов аатынан физико-тиэхиньиичэскэй лиссиэй, Өрөспүүбүлүкэтээҕи лиссиэй-интэринээт, Саха политиэхиньиичэскэй лиссиэй, Дьокуускай куорат лиссиэйин көрдөрүүтүттэн биһиги оскуолабыт көрдөрүүтэ кыра эрээри, бастыҥнар кэккэлэригэр сылдьабыт. 9 кылаас кэнниттэн кыахтаах оҕолор лиссиэйгэ үөрэнэ бараллар, онно үөрэх таһыма үрдүк, бастыҥтан бастыҥ үөрэнээччилэри талан ылаллар.
Биһиги оскуолабыт бэйэтэ туһунан баай устуоруйалаах, манна күүстээх педагогическай кэлэктиип үлэлиир. Эдэр үлэһиттэр кэлэллэр эрээри, оннооҕор куорат килбэйэр киинигэр турар оскуолаҕа учуутал тиийбэт. 2023 с. хомойуох иһин, оскуолаҕа хамнас кыччыы турар, үөрэхтэрин саҥа бүтэрбит эдэр учууталлар хамнас алын кээмэйин ылаллар, оттон уопуттаах учууталлар хамнастара хас чаастаах уруогу биэрэллэриттэн тутулуктаах. Учууталлар 25-30 чаастаахтар, оттон биир ыстаапка 18 чаас. Үчүгэй хамнаһы ылаары үгүстэр 1,5 ыстаапкаҕа сылдьаллар, ноҕурууска эбиллэрэ үөрэх хаачыстыбатыгар эмиэ охсор.
Ол иһин сорох учууталлар улууска үлэлии бараллар, тыа сирин оскуолатыгар хамнас быдан үрдүк, ноҕорууска кыра. Кыра нэһилиэккэ биир кылааска 10-20 оҕо үөрэнэр, оттон куоракка кылааска 25-30 тахса оҕону үөрэтиэххэ наада. Тыа сиригэр учууталлар биир симиэнэҕэ, куоракка икки симиэнэҕэ үлэлииллэр. Кылаас салайааччытыгар төлөнөр эбии харчы тыа сиригэр эмиэ үрдүк. 537 №-дээх Бырабыыталыстыба дьаһалынан куорат учууталларын хамнаһа кыра, тыа сиригэр үрдүк», — диэн быһаарар Айаан Ильич.
Выпускниктар БКЭ-ни төһөнөн үрдүк баалга туттараллар, оччонон талан ылбыт үөрэхтэригэр киирэр кыахтара үрдүүр. Күрэстэһии улахан. Олимпиадаҕа ситиһиилээхтик кыттыбыт оҕолорго эбии баал көрүллэр. Дьокуускай куорат 26 №-дээх оскуолатын дириэктэрэ этэринэн, киһи олоххо ситиһиилээх буолара идэни таба тайаныыттан улахан тутулуктаах. Идэлэрин хаста да уларытар дьон бааллар, көтүмэх киһи тугу ситиһиилэниэй? Дьиэ кэргэҥҥэ хайдах эйгэ баарыттан, оҕону туохха бэлэмнииллэриттэн бу киһи төһө ситиһиилээх буолан тахсара улахан тутулуктаах. Учууталлар оскуолаҕа араас идэ туһунан кэпсииллэр, оҕолор дьоҕурдарын көрөн, идэлэрин сөпкө талалларыгар көмөлөһөллөр.
Дьокуускай куорат үөрэҕин тиһилигэр, муниципальнай үөрэх кыһаларыгар модельнай, штатнай расписание киириэхтээх, итинтэн оскуолаларга төһө ыстаапка көрүллэрэ тутулуктаах. Ону таһынан, оскуолаҕа кырачааннары бэлэмниир уһуйаан үлэһиттэрэ кыра хамнастаахтарын туһунан куруук этэллэр, туруорсаллар, ону үрдэтэргэ Дьокуускай куорат Дууматыгар дьүүллэһиэхтээхтэр. «Бу боппуруостары өрөспүүбүлүкэ таһымыгар, Үөрэх министиэристибэтигэр, Ил Түмэн профильнай сис кэмитиэтигэр таһаарыахха наада дии саныыбын”, — диэн санаатын түмүктүүр Айаан Ильич.
2025 сыл түмүгүнэн РАЕХ риэйтинигэр олоҕуран, өрөспүүбүлүкэҕэ маннык оскуолалар ТОП-20 бастыҥнар кэккэлэригэр киирдилэр:
- Өрөспүүбүлүкэтээҕи лиссиэй-интэринээт
- Дьокуускай куорат лиссиэйэ
- В.П. Ларионов аатынан физико-тиэхиньиичэскэй лиссиэй
- Куораттааҕы классическай гимназия
- Аан дойдутааҕы Аартыка оскуолата
- ХИФУ СУНЦ
- Дьокуускай куорат 17 №-дээх оскуолата
- Дьокуускай куорат 5 №-дээх оскуолата
- Дьокуускай куорат 31 №-дээх оскуолата
- Национальнай политиэхиньиичэскэй 2 №-дээх оскуола
- Саха политиэхиньиичэскэй лиссиэй
- Е.А. Варшавскай аатынан 24 №-дээх информационнай-технологическай лиссиэй
- Дьокуускай куорат 26 №-дээх оскуолата
- Дьокуускай куорат 33 №-дээх оскуолата
- Дьокуускай куорат национальнай гимназията
- Дьокуускай куорат 1 №-дээх оскуолата
- «Айыы кыһата»
- Глобальнай үөрэхтээһин киинин гимназията
- Майатааҕы лиссиэй
- Ньурбатааҕы тиэхиньиичэскэй лиссиэй.
Хаартыска: Дьокуускай куорат 26 №-дээх оскуолатын архыыбыттан.
-
0
-
0
-
0
-
0
-
0
-
0
