Сүүс сыл буолан баран иккистээн бэчээттэммит кинигэ сүрэхтэниитин иннинэ Ил Түмэн вице-спикерэ Афанасий Владимиров Күлүмнүүр туһунан санаатын үллэһиннэ:
«Күлүмнүүр саха бастакы интеллигенциятын лиидэрин быһыытынан биллэр, ону таһынан, «Саха түмсүүтүн» тэрийэн, бастакы уопсастыбаннай түмсүү чэрчитинэн олохтоох нэһилиэнньэ интэриэһин көмүскүүргэ үлэлэспитэ. Василий Васильевич өрөспүүбүлүкэбит судаарыстыбаннаһын архитектора этэ, кини үгүс көрүүлэрэ автономияны тэрийиигэ киирбиттэрэ. Кини научнай үлэлэрэ күн бүгүн Арассыыйа, аан дойду таһымыгар суолтатын сүтэрбэттэр, ону бүгүҥҥү кинигэ сүрэхтэниитэ туоһулуур.
Быйыл норуоттар сомоҕолоһууларын сылыгар доҕордоһуу туһунан үгүстүк этэбит, оттон Күлүмнүүр саха дьоно Арассыыйа империятын норуоттарын кытта иллээх, эйэлээх эйгэҕэ олоруохтаах диэн эппитэ. Сырдатааччы быһыытынан, норуотун туһугар олоҕун анаабыта, кини үөрэххэ, сырдыкка тардыһыы суолтатын туһунан үгүстүк кэпсиирэ. Ону таһынан, бэйэтин төрөөбүт тылын, устуоруйатын, култууратын билбэт киһи омуга суох, ол иһин омук быһыытынан уратыбытын сүтэрбэт туһугар төрөөбүт тылбытын харыстыах, устуоруйаны, култуураны билиэх тустаахпыт. Ити санаанан сирдэтэн, кини бибилэтиэкэлэри, тыйаатыры тэрийбитэ.
Личность быһыытынан үгүс өрүттээҕин псевдонима кэрэһэлиир, күлүмүрдүүр Күлүмнүүр баай нэһилиэстибэни хаалларда. Олоҕо түһүүлээх-тахсыылаах, уустук этэ, ыраахтааҕы Арассыыйа, онтон Сэбиэскэй былаас түрмэтигэр олорбута даҕаны, ол тухары норуотун туһугар тутуһар бириинсиптэрин түһэн биэрбэтэҕэ. Кини пааматынньыгар сибэкки дьөрбөтүн уурдубут, төлөннөөх тыл этилиннэ, кинигэ сүрэхтэниитэ улуу дьоммутугар сүгүрүйэрбитин туоһулуур. Саха норуотун чулуу дьонун умнубакка, кинилэр үлэлэригэр тирэҕирэн, сарсыҥҥы кэскилбитин тутабыт! Эдэр көлүөнэ эмиэ Күлүмнүүр курдук айан-тутан, сайдыы аартыктарын дабайан истин!”, — диэн баҕа санаатын тириэртэ Афанасий Владимиров.
Василий Кононов хаартыскаҕа түһэриитэ.
-
0
-
0
-
0
-
0
-
0
-
0
