Төгүрүк остуолу СӨ Идэлээх сойууһун бэрэссэдээтэлин солбуйааччы Валентина Кириллина, СӨ Уопсастыбаннай балаататын култуураҕа хамыыһыйатын бэрэссэдээтэлэ, Саха сыыркатын генеральнай дириэктэрэ, уус-уран салайааччыта Сергей Расторгуев ыыттылар.
СӨ Инновацияҕа, сыыппара сайдыытыгар уонна инфокоммуникационнай технологияҕа министиэристибэ сонуну киэҥник тарҕатар ситимҥэ уонна бэчээккэ судаарыстыбаннай бэлиитикэни ыытар салаа салайааччыта Афанасий Матвеев информационнай бэбиэскэ хайдах оҥоһулларын туһунан кэпсээтэ. Кини куйаар ситимигэр араас сонуннары ыытар этэрбэс араадьыйата сонуну киэҥник тарҕатар ситимҥэ киирбэтин, оттон «SakhaDay» үс сыллааҕыта СМИ лиссиэнсийэтиттэн аккаастаммытын туһунан иһитиннэрдэ.
«Сонуну киэҥник тарҕатар судаарыстыбаннай ситим эрэдээксийэлэрэ бары лиссиэнсийэлээхтэр уонна тугу суруйбуттарыгар хас биирдии тылыгар тиийэ эппиэтинэһи сүгэр буолан, дьиҥ чахчыга олоҕурбут, бэрэбиэркэлэммит контены бэлэмнииллэр. «Саха» НКИХ нэһилиэнньэ 98% хабар, иккис миэстэни «Сахабэчээт», үсүһү ЯСИА ылар», — диэтэ Афанасий Матвеев.
Дьон куйаар ситимигэр арааһы ааҕан баран ЯСИА-ҕа киирэн төһө кырдьыгын бэрэбиэркэлииллэр. Биэс сыл иһигэр дьон көрүүтэ түөрт төгүл үрдээтэ, ЯСИА 2025 с. түмүгүнэн 40 мөл. тахса кирбиини куоһарда, манна күн аайы 40 000 тахса киһи киирэн сонуннары ааҕаллар.
«Саха» НКИХ киэһээҥҥи өттүгэр федеральнай ханааллары баһыйар, дьон олохтоох сонуннары, сериаллары сөбүлээн көрөллөр. Тэлэбиидэнньэҕэ уһулуччу ситиһиилэрин иһин «ТЭФИ» Арассыыйатааҕы национальнай бириэмийэни үс төгүл ыллылар. Сериал усталларыгар бүддьүөттэн харчы ылбаттар, бу улахан интеллектуальнай, айар үлэттэн тахсар. Киинэлэрин сайын, дьон уоппускаҕа барар кэмигэр усталлар. Оҕо төрөөбүт тылын билэрин туһугар «Тооку» оҕо ханаала аһыллыбыта, сахалыы, хотугу аҕыйах ахсааннаах норуоттар тылларынан мультиктары көрдөрөллөр.
Эрэгийиэн социальнай, дьону долгутар кыһалҕалаах сытыы боппуруостарын сырдатарга, Уопсастыбаннай балаатаны кытта бииргэ үлэлэһэргэ «Сахамедиа» генеральнай дириэктэрин солбуйааччы Чокуур Гаврильев, «Сахабэчээт» генеральнай дириэктэрин солбуйааччы Ольга Семенова, «Саха» НКИХ генеральнай дириэктэрин бастакы солбуйааччы Ирина Ефимова санааларын үллэһиннилэр.
«Дьон сонуну киэҥник тарҕатар судаарыстыбаннай ситимҥэ ордук итэҕэйэр, «Саха» НКИХ, ЯСИА-ҕа тахсыбыт сонун баар чахчыга олоҕуран оҥоһуллар. Суруналыыстыка оскуолата матырыйаалы бэлэмнииргэ хос бэрэбиэркэлииргэ, сонуну хас да источниктан ыларга, этиканы тутуһарга, объективнай буоларга үөрэтэр. Сымыйаны кырдьыктан араарарга «Антифэйк» диэн портал баар, эрэгийиэни салайар киин үлэлэһэр», — диэн быһаарда Ирина Ефимова.
«Сахамедиа» генеральнай дириэктэрин солбуйааччы Чокуур Гаврильев сытыы боппуруостары сырдатарга «Саха Сирэ» уонна «Кыым» хаһыат төгүрүк остуоллары ыытар үтүө үгэстээхтэрин бэлиэтээтэ. Уопсастыбаннай кииҥҥэ ити холобуру салҕыахха, эспиэртэри, норуот дьокутааттарын, миниистирдэри ыҥырыахха сөбүн иһитиннэрдэ. Кини аҥаардас отчуоттары сырдатан, ааҕааччы болҕомтотун тардыбаккын, интэриэһинэй, дьону долгутар, мөккүөрдээх тиэмэни булуохха наада диэтэ. Быһылаан таҕыстаҕына түргэнник хабан ылан суруйан, уопсастыбанньыктар санааларын тиэрдэр тоҕоостооҕун эттэ.
«Сахабэчээт» генеральнай дириэктэрин солбуйааччы Ольга Семенова күн бүгүн «Сахабэчээккэ» өрөспүүбүлүкэ уонна улуус хаһыаттарын, сетевой таһаарыыларын эрэдээксийэлэрэ киирэллэрин туһунан билиһиннэрдэ. Кини улуустарга уопсастыбаннай санаа лиидэрдэрин буларга дьон санаатын аһаҕастык этэртэн толлорун, Арассыыйа судаарыстыбаннаһын тутулун туһунан сырдатар үлэ ситэ кыалла илигин туһунан эттэ. Ону таһынан, төһө даҕаны уустук кэм бүрүүкээбитин үрдүнэн, бэчээт таһаарыыларын оптимальнай минимумун тутан хаалар наадалааҕын тириэртэ. Ааҕааччы сааһыттан, тугу сөбүлүүрүттэн, туох интэриэстээҕиттэн көрөн тус-туһунан контент оҥоһуллуохтааҕын чопчулаата.
Маны таһынан, төгүрүк остуолга суруналыыстар күн бүгүн дьиэ сууйааччыттан даҕаны кыра хамнастаахтара, итинтэн сылтаан эдэр дьон үлэлии кэлбэттэрэ, ол иһин суруналыыс идэтин статуһун үрдэтэр уолдьаспыта этилиннэ. Түмүккэ сонуну киэҥник тарҕатар ситим үлэһиттэрэ Уопсастыбаннай балаатаны кытта бииргэ үлэлэһэр былааннарын торумнаатылар.
Ааптар хаартыскаҕа түһэриитэ.
-
3
-
0
-
0
-
0
-
0
-
0
