«Муниципальнай тэриллиилэргэ өрөспүүбүлүкэ суолун хаһаайыстыбатын пуондатыттан 916 мөл. солк. ыыппыттар. Бу үбү олохтоох суолу бырайыактыырга, тутарга, хапытаалынай өрөмүөнү ыытарга туттубуттар. 22 муниципальнай тэриллиигэ, 54 эбийиэккэ 114 км. уһуннаах суол оҥоһулунна», — диэн Ил Түмэҥҥэ СӨ Тырааныспарга уонна суол хаһаайыстыбатыгар миниистир солбуйааччыта Ольга Рафаилова 2025 сыл түмүгүнэн тырааныспар сырыытын, суолу-ииһи, күргэни тутуу, аэропуортары, тиэхиньикэни саҥардыы туһунан бырабыыталыстыба отчуотун билиһиннэрдэ.
Үйэ мэҥэ тутуута саҕаланан, Өлүөнэ эбэни туоруур күргэни тутарга биэрэк уҥа өттүгэр сирин үрдэттилэр, эстакаада сыбаайатын түһэрдилэр, хаҥас кытылга үс коффердамтан биирин хомуйдулар, күргэ тутуутугар маннык технологияны Арассыыйаҕа аан бастаан тутталлар. 26 атахтан бастакы атаҕын түһэрдилэр, барыта 920 сыбаайа оҥоһуллуохтаах.
Былаан быһыытынан, өрүс сүнньүгэр икки коффердамы таһаарыахтаахтар, эбэ дириҥиир сиригэр, өрүс үөһүгэр күргэни тутарга салгыы үлэлиэхтэрэ, икки кытылга акылаат атаҕын түһэриэхтэрэ.
Ону таһынан, эрэгийиэннээҕи суолга Өлүөхүмэ улууһугар Улахан Черепаниха, Кыра Черепаниха, Дьорооху уонна Сунтаар улууһугар Улахан Харыйалаах өрүһү туоруурга күргэ өрөмүөнэ оҥоһулунна.
Суолу оҥорууну үбүлээһин кээмэйэ 18,9 млрд. солк., онтон 6,3 млрд. солк. федеральнай бүддьүөттэн. Дьокуускайга Ойуунускай (Дежневаттан Октябрьскайга диэри), Хабаров (Ярославскайтан Богатыревка диэри), Сэбиэскэй Аармыйа 50 сыла (Кальвицаттан Бабушкина диэри) уулусса хапытаалынай өрөмүөнэ саҕаланна.
Ааспыт сыл түмүгүнэн суолга тахсар саахал 6,1%, эмсэҕэлээбит дьон ахсаана 9,1% кыччаабыт эрээри, олохтон соһумардык туорааһын 3,9% эбиллибит. Өрөспүүбүлүкэҕэ суолга массыына сырыытын хаартыскаҕа, видеоҕа устар 160 тэрил баар, ол иһигэр 10 мобильнай.
Хаартыска Андрей Сорокин, ЯСИА.
-
0
-
0
-
0
-
0
-
0
-
0
