Улахан баартыйа сийиэһин үлэтигэр түөрт тыһыынчаттан тахса киһи – дэлэгээттэр уонна ыҥырыылаах ыалдьыттар кытыннылар. Дэлэгээттэр ортолоругар Саха сириттэн баартыйа бэрэстэбиитэллэрэ эмиэ кытыннылар. Дэлэгээссийэни «Биир ньыгыл Арассыыйа» баартыйа Саха сиринээҕи бэлитиичэскэй сэбиэтин Президиумун чилиэнэ уонна Ил Түмэн Судаарыстыбаннай мунньаҕын бэрэссэдээтэлэ Алексей Еремеев салайда.
Сийиэс бастакы түһүмэҕэр икки боппуруоһу көрдүлэр: ааспыт биэс сылга Норуодунай бырагыраама түмүктэрин бу күһүн ыытыллыахтаах Судаарыстыбаннай Дуума IX ыҥырыытын быыбарыгар хандьыдааттар испиэһэктэрин бигэргэтии.
Саха Сирин парламенын бэрэссэдээтэлэ Алексей Еремеев биллэрбитинэн, баартыйа сийиэһин пленарнай мунньаҕар Арассыыйа бэрэсидьиэнэ Владимир Путин тыл этиитигэр «Биир ньыгыл Арассыыйа» дойду уопсастыбаннай-бэлитиичэскэй олоҕор улахан оруолун бэлиэтээтэ. «Арассыыйа мэлдьи күүстээх, норуот сомоҕолоһуутунан кыайара. Чуолаан биһиги ис сомоҕолоһуубут куһаҕан санаалаахтарга сынньалаҥы биэрбэт. Кинилэр тугу да ситиһиэхтэрэ суоҕа, билигин да оннук буолуоҕа. Бүгүн биһиги норуоппут инники кирбиигэ сылдьар дьоруойдары өйүүр. «Биир ньыгыл Арасыыйа» ытык иэһэ – Кыайыы туһугар барытын оҥоруу», – диэн бэрэсэдьиэн тоһоҕолоон бэлиэтээтэ.
Алексей Ильич Владимир Путин билиҥҥи кэм уустуктардаах уонна дойду дьылҕатыгар ураты суолталаах диэн эппитин санатта. Бэрэсидьиэн билигин Арассыыйа сайдыытын тохтото сатыыр дьайыыларга ситиһиилээхтик утарылыһар, туруоруллубут соруктары толорорго биһиги дойдубутугар сөп буолар күүс-уох, сэп-сэбиргэл уонна бэлитиичэскэй быһаарыы баарын биллэрбит.
Ону тэҥэ, Арассыыйа сайдыытыгар туһуламмыт сүрүн суолталаах стратегическай бырагыраамалар бары толору толоруллуохтара, булгуччу олоххо киллэриллиэхтэрэ. Дойду баһылыга Арассыыйа экэниэмикэтин саҥа бириинсиптэргэ олоҕурбут саҥа технологическай таһымҥа таһаарарга эрэннэрбитин эттэ. Ол курдук, аан бастакынан олорор дьиэни уонна суолу тутуу салгыы ыытыллыаҕа, үлэ миэстэлэрэ таһаарыллыахтара, биисинэһи өйөөһүн уонна урутаан сайдар индустрияны салгыы сайыннарыы ыытыллыаҕа диэн биллэрбит. Кини хандьыдааттарга туһаайан “мессенджердэргэ өр олорбокко” дьону кытта үгүстүк көрсөргө сүбэлээтэ. “Дьоҥҥо чугас буолуу – баартыйа акылаата”,- диэн сөпкө ыйбыт.
Баартыйа салайааччыта Дмитрий Медведев тыл этиитигэр «Биир ньыгыл Арассыыйа» дьон итэҕэлин ыларга эрэ буолбакка, уопсастыба интэриэһин өрө тутан, Арассыыйа сайдыытыгар туһуламмыт үлэни салгыырга дьулуһарын чорботон: «Биир ньыгыл Арассыыйа» норуот бырагырааматын саамай уустук балаһыанньаҕа даҕаны тохтоппокко толорбута. Биһиги, улахан ыарахаттар баалларын да иһин, сайдыы биир да сүрүн хайысхатын тохтоппоппут. Норуот бырагыраамата – бу үлэлиир, тыыннаах докумуон, биһиги ону уларыйыылары учуоттаан, дойдубутугар биллэриллибит улахан хааччахтааһыҥҥа сөптөөх хоруйу биэрэн, бэтэрээннэри, дьиэ кэргэттэри өйүүргэ өссө саҥа салааларынан байыттыбыт», – диэн санатта.
Былаас баартыйатын бэрэссэдээтэлэ «Биир ньыгыл Арассыыйа» саҥа норуот бырагырааматын соруктарын уонна сүрүн хайысхаларын туһунан кэпсээтэ. Ол курдук, бырагыраама олохтоохтор накаастарыгар тирэҕириэҕэ. 2.0 норуот бырагырааматын оҥоруу салҕанар уонна атырдьах ыйыгар иккис түһүмэххэ бигэргэтиллиэҕэ. Оттон бу түһүмэххэ сийиэс федеральнай уонна биир мандааттаах уокуруктарынан хандьыдааттары туруорда.
Биһиги өрөспүүбүлүкэбититтэн Арассыыйа Федерациятын Федеральнай Мунньаҕын тохсус ыҥырыылаах Судаарыстыбаннай Дууматыгар дьокутаакка хандьыдааттар испииһэктэригэр 1 №-дээх эрэгийиэннээҕи бөлөххө Галина Данчикова уонна Василий Егоров киирдилэр. Петр Шамаев 29 №-дээх Дьокуускайдааҕы биир мандааттаах быыбардыыр уокуругар хандьыдаат быһыытынан туруоруллубута.
Хаартыскалар Ил Түмэн саайтыттан
-
0
-
0
-
0
-
0
-
0
-
0
