«Ытыктабыллаах Саха Өрөспүүбүлүкэтин Авиалесоохранатын үлэһиттэрэ уонна бэтэрээннэрэ! Идэлээх бырааһынньыккытынан итиитик-истиҥник эҕэрдэлиибин!» — диэн Ил Дархан эҕэрдэтин саҕалыыр.
Кини бэлиэтииринэн, 2026 сылга Арассыыйа ойуурун авиациянан харыстыыр систиэмэтэ 95 сааһын – бэлиэ түгэнин туолуоҕа. 1931 сыл от ыйын 7 күнүгэр бастакытын По-2 сөмөлүөт ойууру кэтээн көрөр соруктаах халлааҥҥа көппүтэ. Бу күнтэн саҕаланнаҕа, дойдубут ойуурун пуондатын көмүскүүр, эр санаалаах уонна бэриниилээх үлэһиттэрдээх сулууспа олоҕо.
«Саха сирэ — дойду саамай киэҥ нэлэмэн территориялаах эрэгийиэнэ, манна ойуур пуондата 250 мөлүйүөн гектардан тахса (бу өрөспүүбүлүкэ уопсай иэнин 82,6% ылар). Айсен Николаев ойуур баһаарынайдарын, парашютист-десантниктар, лүөччүк-кэтээн көрөөччүлэр уонна диспетчердэр үлэлэрэ ураты, стратегическай суолталааҕын бэлиэтээтэ.
«Чуолаан эһиги хотугу айылҕабытын, дэриэбинэлэрбитин уонна куораттарбытын, саха дьонун доруобуйатын уонна куттала суох буолуутун харабыллыыгыт — ыраах сытар сирдэргэ баһаар турбутун чаас аҥаарынан булан, уоту бастакынан бэйэҕитигэр ылынаҕыт», — диэн Ил Дархан махталын биллэрдэ.
Тиһэх сылларга өрөспүүбүлүкэ ойууру баһаартан көмүскүүр систиэмэтин биллэрдик бөҕөргөттө. Арассыыйа Бэрэсидьиэнэ Владимир Путин өйөбүлүнэн бу хайысхаҕа федеральнай үбүлээһин улаатта. Ол түмүгүнэн «Авиалесоохрана» судаарыстыбаннай бүддьүөт тэрилтэтигэр түөрт саҥа авиа-салаа аһылынна: Витимҥэ, Саҥыйахтаахха Эдьигээҥҥэ уонна Орто Халымаҕа. Бу хамсааныы баһаартан көмүскэнэр территория иэнин 10 мөлүйүөн гектардан тахсанан кэҥэттэ — 82,1 мөлүйүөн гектарга тиийдэ.
Ону таһынан, быйыл ойуур баһаарынайдарын ахсаана 145 киһинэн элбээн, 1 412 үлэһиккэ тиийдэ. Тиэхиньикэнэн хааччыллыы эмиэ күүскэ барар: аныгы баһаары умулларар тэриллэр, пилота суох көтөр аппарааттар (БПЛА) уонна анал тиэхиньикэ паарката эбиллэр.
Ил Дархан хас биирдии баһаар туруон сөптөөх кэмигэр үлэһиттэр ыарахан усулуобуйаҕа: дьон тиийбэт ыраах сирдэригэр, куйааска, дьиэ кэргэннэриттэн тэйиччи сылдьан үлэлииллэрин тоһоҕолоон эттэ. Үлэһиттэр түргэн-тарҕан уонна дьоҕурдаах буоланнар, сыл аайы улахан ойуур баһаардара тахсарын тохтотоллор. Бу кэннигэр күн аайы барар сүдү улахан үлэ турар.
Айсен Николаев сулууспа бэтэрээннэригэр ураты махтал тылларын анаата. Кинилэр билигин даҕаны эдэр исписэлиистэргэ уопуттарын үллэстэллэр. Саха сирин ойуурун харыстыыр систиэмэ кинилэр билиилэригэр-көрүүлэригэр олоҕурар.
«Күндү доҕоттор! Эһиги үлэҕит өрөспүүбүлүкэҕэ эрэ буолбакка, бүтүн дойдуга улахан суолталаах. Эһиги эппиэтинэскититтэн уонна идэҕитигэр бэриниигититтэн ойуурбут тыыннаах буолуута, нэһилиэнньэлээх пууннар куттала суох туруктара уонна дьон-сэргэ уйаҕас олоҕо тутулуктаах. Истиҥник эһиэхэ чэгиэн доруобуйаны, күүһү-уоҕу, эрэллээх доҕоттору уонна иннигитигэр турар соруктары ситиһиилээхтик толороргутун баҕарабын. Дьолу, эйэни уонна саҥа үрдүк ситиһиилэри! Бырааһынньыгынан! Арассыыйа Авиалесоохранатын күнүнэн!» — диэн түмүктээтэ Айсен Николаев.
Хаартыска: https://gtrksakha.ru
-
1
-
0
-
0
-
0
-
0
-
0
