Саха Сиригэр ойуур баһаардарын балаһыанньата уустугурбутунан, от ыйын 10 күнүттэн эрэгийиэннээҕи таһымнаах ыксаллаах быһыы-майгы (ЧС) эрэсиимэ киирэр. Маннык быһаарыы ойуур баһаардарын утары охсуһууга эбии күүһү уонна тиэхиньикэни түмэр соруктаах ылылынна.
Ыксаллаах быһыыны-майгыны сэрэтэр уонна туоратар, баһаар куттала суох буолуутун хааччыйар хамыыһыйа мунньаҕар Ил Дархан Айсен Николаев билиҥҥи күн-дьыл туруга балаһыанньа уустугурарыгар төрүөт буоларын бэлиэтээтэ. Өрөспүүбүлүкэ киин өттүгэр +35-36 кыраадыска тиийэ итии күннэр тураллар. Маны таһынан, күүтүллэр сөрүүн түһүүтэ тыал күүһүрүүтүнэн уонна этиҥнээх ардаҕынан доҕуһуолланыан сөп, бу эмиэ саҥа баһаардар тахсалларыгар уонна уот тарҕанарыгар кутталы үөскэтэр.
Ил Дархан муниципальнай тэриллиилэр баһылыктарыгар, ойуур баһаарын утары охсуһар тэриллиилэр салайааччыларыгар уонна бары сыһыаннаах сулууспаларга баһаардары умулларыыга, саҥа уот туруутун сэрэтиигэ үлэни күүһүрдэллэригэр соруйда. Кини чугастааҕы күннэргэ баар күүһү-күдэҕи толору түмүү ирдэнэрин тоһоҕолоон эттэ.
Уопсайа 262 баһаар
Билиҥҥи туругунан 18 улуус сиригэр-уотугар 26 143,7 гектар иэннээх 57 ойуур баһаара турар. Онтон 18 ойуур баһаарын умулларар үлэтэ күүскэ барар.
Баһаардары умулларыыга 646 киһи уонна 15 тиэхиньикэ үлэлиир. Ойуур баһаарын балаһыанньатын кэтээн көрүүгэ 18 салгын суудуната туһаныллар, оттон умуллурууга быһаччы биэс Ми-8 бөртөлүөт үлэлии сылдьар. Ойуурга баһаара турар кутталлаах кэмэ саҕаланыаҕыттан ойуур пуондатын сирдэригэр уопсайа 50 061,2 гектар иэннээх 262 баһаар бэлиэтэннэ. Ааспыт сыл маннык кэмигэр 53 985,75 гектардаах 154 ойуур баһаара баар этэ.
Тутатына түргэнник дьайыы
Мунньах кыттыылаахтара баһаар куттала суох буолуутун ирдэбиллэрин кэһиини туоратыы уонна сэрэтэр үлэни күүһүрдэр наадалааҕын дьүүллэстилэр. Муниципальнай тэриллиилэр баһылыктарыгар нэһилиэнньэлээх пууннары көмүскүүр бары тэрээһиннэри толороллоругар сорудах бэрилиннэ. Маны таһынан, ойуур баһаардара туруутугар буруйдаах дьоннору булууга үлэни күүһэрдэр сорук туруорулунна.
Айсен Николаев чугастааҕы күннэргэ ардахтаах былыттар баалларын-суохтарын сыаналыырга уонна күн-дьыл туруга көҥүллүүр буоллаҕына, ардаҕы искусственнайдык түһэрэр үлэни тэрийэргэ соруруйда.
Мунньах түмүгэр Саха Сирин Ил Дархана чугастааҕы кэмҥэ сүрүн соругу ыйда — билиҥҥи турар баһаардар тарҕаналларын таһаарбат буолуу уонна өрөспүүбүлүкэ бары сиригэр-уотугар саҥа уот туруутугар тутатына, түргэнник миэрэни ылыы.
Хаартыска: ЯСИА
-
0
-
0
-
0
-
0
-
0
-
0
