Дойду баһылыгын кытта тус кэпсэтиигэ Айсен Сергеевич Саха Сирин социальнай-экэнэмиичэскэй сайдыытын, төрөөһүнү өйүүр миэрэлэр уонна инфраструктура бырайыактара олоххо киириилэрин туһунан билиһиннэрдэ.
Ил Дархан билигин өрөспүүбүлүкэ экэниэмикэтэ төһө да уустуктары көрүстэр, бигэ туруктаахтык сайдарын уонна оҕо төрөөһүнүн, элбэх оҕолонууну өйүүр миэрэлэр тустарынан иһитиннэрдэ. Анал байыаннай дьайыы кыттыылаахтарыгар уонна кинилэр дьиэ кэргэттэригэр көмөнү оҥорууга ураты болҕомто уурулунна. Бэрэсидьиэн ыараханнык бааһырбыт байыастарга уонна кинилэр дьиэ кэргэттэригэр хаачыстыбалаах көмөнү оҥоруу суолтатын тоһоҕолоон бэлиэтээтэ.
Көрсүһүү кэмигэр улахан болҕомто бырамыысаланнас, чуолаан сир баайын хостуур салаа туругар уурулунна. Эрэгийиэн баһылыга бырамыысыланнаска уонна сир баайын хостооһуҥҥа ситиһиилэри, алмаас хостуур «АЛРОСА» хампаанньа аан дойдуга соҕотох барыстаахтык үлэлиир алмааһы хостуур тэрилтэ буоларын, төһө да уустуктары көрүстэр, ыарахаттары аахсыбакка 2025 сыл түмүгүнэн барыстаах тахсыбытын санатта. Өрөспүүбүлүкэ атын да салаалара, холобура, үрүҥ көмүһү (586 туонна) хостооһуҥҥа Арассыыйаҕа бастакы миэстэҕэ таҕыста, кыһыл көмүскэ иккис (56,5 туонна), чоххо эмиэ иккис (51 мөлүйүөн туонна), ньиэпкэ уонна гааска биэс бастыҥ иһигэр киирэрин билиһиннэрдэ.
Айсен Сергеевич салгыы инфраструктура бырайыактарын туһунан, «Эльгауголь» хампаанньа Чуумпу акыйааннааҕы тимир суолун бырайыага олоххо киирэн, таһаҕаһы таһыы кыамтата сылга 30 мөлүйүөн туоннаҕа тиийбитин туһунан кэпсээтэ. Ону таһынан, Аартыкаҕа аналлаах «Синергия Арктики» диэн 11 миллиард солкуобай суумалаах баараҕай телекоммуникационнай бырайыак саҕаламмытын бэлиэтээтэ. Бу бырайыак Аартыка 61 бөһүөлэгин оптоволокно ситиминэн холбуоҕа, ыаллыы Чукуотканы уонна Хотугу муора суолун кытта ситимниэҕэ.
Айсен Николаев үс сыл иһигэр киллэриллэр 2 гигаватт кыамталаах энэргиэтикэ эбийиэктэрэ тутулла туралларын иһитиннэрбитин Бэрэсэдьиэн үчүгэйинэн сыаналаата. Холобура, билигин Ленскэйгэ Новоленскай ГРЭС («Интер РАО»), Нерюнгритааҕы ГРЭС иккис уочарата уонна Дьокуускайдааҕы ГРЭС-2 иккис уочарата тутуллаллар. Ол эрэн, тарыыптар үрдүктэринэн уонна Уһук Илин энэргиэтикэтин ситимин өйөөһүн наадатынан, кэккэ ыарахаттар баалларын бэлиэтээтэ.
Владимир Путин Саха Сирин экэниэмикэтигэр инбэстииссийэ кээмэйэ кыратык түспүтүн бэлиэтээтэ. Айсен Николаев бу көстүүнү «Сибиир күүһэ» гаас ситимин тутуу түмүктэммитинэн быһаарда. Инбэстииссийэ кээмэйэ муҥутаан 795 млрд солк. тиийэ сылдьыбыт буоллаҕына, билигин 780 млрд солк. таһымыгар баар, ол да буоллар бүддьүөт туолуута бигэ.
Көрсүһүү түмүгэр Айсен Николаев Бэрэсидьиэҥҥэ байыаннай дьайыы кыттыылаахтарын ааттарыттан саха быһаҕын бэлэхтээтэ. Быһахха «Үрдүкү Главнокомандующайга саха буойуттарыттан» диэн суруктаах. Онуоха Бэрэсидьиэн махталын биллэрдэ.
Хаартыска Саха.гов.ру
-
1
-
0
-
0
-
0
-
0
-
0
