Дьокуускай куорат уокуруктааҕы дьаһалтатын пресс-сулууспата иһитиннэрбитинэн, бу сайабылыанньаҕа олоҕуран өрөспүүбүлүкэ салалтатын бэрэстэбиитэллэрэ кыттыылаах киин куорат Дууматын XXVII уочараты таһынан пленарнай мунньаҕын ыҥырар туһунан дьаһалга илии баттанна.
Биллэрин курдук, Ил Дархан Айсен Николаев куорат Дууматыгар Дьокуускай баһылыгын дуоһунаһыгар икки кандидатураны: СӨ Бырабыыталыстыбатын бэрэссэдээтэлин бастакы солбуйааччытын Дмитрий Садовниковы уонна Владислав Созонову киллэрбитэ. Сотору кэминэн кинилэр кандидатураларын олохтоох бэйэни салайыныыга, сокуоннаах буолууга уонна регламеҥҥа сис хамыыһыйата көрүөҕэ уонна дьокутааттар көрүүлэригэр түмүк бэлэмниэҕэ.
«Докумуоннар киирбиттэрин кэннэ, тус хамыыһыйаҕа уонна Дьокуускай куораттааҕы Дуума президиумугар ыытыллаллар. Онтон боппуруос сиэссийэ көрүүтүгэр тахсар, онно хамыыһыйа бэрэссэдээтэлэ хандьыдааттары уонна хамыыһыйа түмүгүн билиһиннэрэр. Салгыы куорат дьокутааттара хандьыдааттарга боппуруостарын биэриэхтэрин, бэйэлэрин санааларын этиэхтэрин уонна дьүүллэһиигэ кыттыахтарын сөп. Ол кэннэ аһаҕас куоластааһын ыытыллыаҕа, онно хас биирдии дьокутаат биир эрэ хандьыдаакка куолаһын биэриэн сөп», — диэн Дьокуускай куорат Дууматын бэрэссэдээтэлэ Альберт Семенов быһаарыыта тахсыбыта.
Куорат бэрэстэбиитэллээх уорганын салайааччыта бэлиэтииринэн, мунньахха баар дьокутааттарын аҥаарыттан ордук куолаһы ылбыт хандьыдаат куорат баһылыгынан биллэриллиэҕэ. Дьокуускай куорат баһылыгын боломуочуйатын болдьоҕо уруккутун курдук биэс сыл буолар.
Хаартыска ЯСИА
-
0
-
0
-
0
-
0
-
0
-
0
