Онно кини сүрүн иһитиннэриини оҥорбут Сбербанк бэрэсидьиэнэ, бырабылыанньатын бэрэссэдээтэлэ Герман Греф этиитин ордук сэҥээрдим диэн биллэрбит. Ол курдук оҥоһуу өй билигин сайдыы саҥа түһүмэҕэр киирэн, судургу соҕус, чопчу, анал соруктары эрэ толорор эрэ, киһи тас эйгэттэн ылынан, толкуйдаан оҥорор дьайыыларын оҥорор дьоҕурдаммыт. Холобура тыаһы, видеоны, хартыынаны, тиэкиһи уонна араас кодтары туһанан бэйэтэ ааҕан-суоттаан быһаарар буолла. Ол аата бэйэтэ оҥорон көрөн айар, генерациялыыр кыахха киирдэ диэн быһаарбыттар. Герман Греф билигин оҥоһуу өй сайдыытын үһүс түһүмэҕэр киирбитин, өйдөөх ситимнэр кини бара турар процеһы бүтэһигэр тиийэ оҥорон, соругу толорон, түмүктүүр кыаҕы биэрдилэр диэн эппитин сенатор чопчулаата. Ол курдук, бу иннинэн ыытыллыбыт тургутуулар түмүктэринэн, оҥоһуу өйдөөх агенынан салайыллар байыаннай истребитель киһини бары өртүнэн кыайбыта да ону туоһулуур диэн холобурдаабыт.
«Бүгүҥҥү күҥҥэ сүрүн соругунан оҥоһуу өй кыаҕын барытын биир тэрилгэ көһөрүү уонна информацияны роботтарынан сыымайдатыы турар. Ону билигин физичэскэй оҥоһуу өй дииллэр, ханнык баҕарар формалаах буолуон сөп: бэйэтэ барар массыына араас көрүҥүттэн, көтөр дроннарга тиийэ. Оҥоһуу өй билигин экэниэмикэ, билим, мэдиссиинэ, үөрэх бары салааларыгар улахан дьайыыны оҥорор. Киһи үлэлиир, хамсыыр бары эйгэтигэр өтөн киирэн, баһылыыр-көһүлүүр технология буолла. 2025 сылга билим саҥа арыйыыларын 80 % оҥоһуу өй көмөтүнэн оҥоһуллубута. Сылтан сыл оҥоһуу өйгө наадыйыы өссө күүһүрэн, туттуу, туһаныы улаатан иһиэҕэ. Хайа баҕара исписэлиис, учуонай көдьүүһүн кини оҥоһуу өй ситимнэрин кытта төһө сатабыллахтык үлэлэһэриттэн көрөн быһаарыллыаҕа. Арассыыйа маннык глобальнай уларыйыыларга эппиэттэһэр, бэйэтэ төрүт туспа мадьыаллары оҥороро, ааҕар-суоттуур инфраструктураны тэрийэрэ, алгоритмы уонна сөптөөх быһаарыылары ыланара наада», -диэн иһитиннэрбит Арассыыйа сүрүн баанын салайааччыта. Федерация Сэбиэтин бэрэссэдээтэлэ Валентина Матвиенко дьүүллэһии түмүгэр, Арассыыйа оҥоһуу өйү сайыннарыыга бастыҥбуолуохтааҕын бэлиэтээн: «Биһиги бу өртүгэр хайдах да хаалынньаҥ буолар бырааппыт суох», -диэн тоһоҕолоон эппитин сенатор Сахамин Афанасьев чорботон бэлиэтээбит.
Санатар буоллахха, соторутааҕыта Аммаҕа Ил Түмэн көһө сылдьар мунньаҕар оҥоһуу өй биһиги олохпутугар киириитин туһунан боппуруос бэбиэскэҕэ туруоруллан көрүллүбүтэ, киэҥ дьүүллэһиини ааспыта. Парламент бэрэссэдээтэлэ Алексей Еремеев оҥоһуу өй хайдах да гыммыппыт иһин күннээҕи олохпутугар өтөн киирэр турарын, онуоха биһиги бэлэм буолуохтаахпытын эппитэ.
Хаартыска Сахамин Афанасьев мах-ханаалыттан
-
1
-
0
-
0
-
0
-
0
-
0
