Өлүөнэ өрүс аллараа сүүрүгэр, Дьокуускай аннынан уу 14 см түһэн, 604 см тэҥнэстэ, кутталлаах таһыма 827 см. Суукка устатыгар Табаҕаҕа, Кангалааска, Пригороднайга уу эриэ-дэхси түһэрэ бэлиэтэнэр. Нам улууһугар Граф Биэрэгэр уу таһыма 885 см, Ымыйахтаахха 572 см тиийдэ.
Сунтаар улууһугар Бүлүү өрүскэ түһэр салаа үрэхтэргэ сайыҥҥы халаан уута тахсан билигин төһө хоромньуну таһаарбытын ааҕыы барар. 159 олбуор уонна 77 олорор дьиэ ууга барбыта билиннэ. Билигин 89 олбуор уонна 44 олорор дьиэ ууга баран тураллар. Халаан уутун содулугар Бүлүү өрүс кытыла эмпэрэлээн сууллуута бэлиэтэннэ, Кэмпэндээйи, Туойдаах уонна Тэҥкэ сэлиэнньэлэрин икки ардыларыгар тырааныспар сырыыта тохтоото.
Дьааҥы өрүскэ Баатаҕайга, Верхоянскайга суукка иһигэр 31 см тахсан 713 см тиийдэ (кутталаах таһыма 1020 см), Баатаҕайга 65 см түһэн 680 см тиийдэ. Бытантай өрүскэ Сайдыыга 23 см түһэн 942 см тиийдэ (кутталлаах таһыма 978 см). Дулҕалаах өрүһүгэр Суордаахха уу туһыма 853 см тиийэн 41 олбуору, 35 олорор дьиэни ылла. Сартаҥ өрүһүгэр Үҥкүр аннынан 118 см тахсан, 436 см тиийдэ (кутталлаах таһыма 500 см). Дьааҥы өрүс салааларыгар: Дулҕалаахха, Сартаҥҥа, Адыаччыга, Боруулаахха чугастааҕы үс хонук устатыгар уу таһыма үрдүүрэ, ардах тохтооботунан халаан уута хаттаан киириитэ сабаҕаланар.
Бытантай өрүскэ Эбээн Бытантай улууһун сиригэр-уотугар уу түһэр, ууга барбыт олбуордар босхолоннулар (биир олбуор ууттан босхолоно илик). 671 гектар оттонор ходуһа ууга баран тураллар.
Хаартыска: СӨ Быыһыыр сулууспата
-
0
-
0
-
0
-
0
-
0
-
0
