Уопсастыба

Норуот дьокутаата, Ил Түмэн хотугу сир төрүт олохтоох аҕыйах ахсааннаах омуктарын боппуруостарыгар уонна Аартыка дьыалаларыгар сис кэмитиэтин бэрэссэдээтэлэ Елена Голомареваны кытта сибээскэ тахсыбыппытыгар, кини баар балаһыанньаны билиһиннэрдэ.

-Өлөөн улууһун уустук суоллаах-иистээх Ээйик нэһилиэгэр улахан ойуур баһаара туран, бөһүөлэккэ 6-7 килэмиэтир чугаһаан кутталлах балаһыанньа үөскээн бу күннэргэ суһал дьаһаллар ылыныллан, уоту бохсор үлэ бара турар. Ол курдук, ыаллыы Ньурба, Эдьигээн улуустарыттан авиалесоохрана исписэлиистэрэ бөртөлүөтүнэн тиийэн билигин бөһүөлэк чугаһынан анал балаһаны хаһан, хорон оҥоро сылдьаллар. Билиҥҥитэ  уоту умуруорууга уопсайа 98 киһи үлэлэһэр.

Ньурба улууһун олохтоохторо көмө оҥорбуттарын бэлиэтиэхпин баҕарабын. Аҕыйах чаас иһигэр кинилэр Ээйиккэ бөртөлүөт көтөөрү турдаҕына гуманитарнай көмөнү хомуйа охсон ыыттылар. Түгэнинэн туһанан Ньурба улууһун олохтоохторугар дириҥ махталбын тириэрдэбин.  Бүгүн, от ыйын 27күнүгэр СӨ кырасдааныскай көмүскэбил дьыалатыгар уонна нэһилиэнньэ олоҕор-дьаһаҕар куттал суох буолуутун хааччыйыыга миниистирэ Дмитрий Лепчиковы кытта сибээскэ тахса сырыттым, суһал дьаһаллар туһунан чуолкайдастым. Билиҥҥитэ балаһыанньа хонтуруолланар, уоту бохсууга ыытыллар үлэ көдьүүстээх.

 Дьааҥы улууһугар Сайдыы, Суордаах нэһилиэктэригэр ардахтар түһэн, өрүстэр халааннаан, олохтоох нэһилиэнньэ олоҕор-дьаһаҕар улахан хоромньуну таһаардылар. Билигин Хотугулуу-Илин улуустартан Ил Түмэн дьокутаата Сергей Сивцевы кытта бу хайысханан ыкса үлэлэһэбит. Бу ааспыт нэдиэлэҕэ, от ыйын 24-26 күннэригэр ыҥырыы таһааран  Дьокуускайга, атын да улуустартан гуманитарнай көмө оҥоһуллуутун сүрүннүүбүт. Уопсайынан норуот дьокутааттара бу өртүгэр эмиэ үлэлэһэллэр, өйүүллэр.

Дьокуускайга Курашова 24№-гэр СӨ  «Биир Ньыгыл Арассыыйа» бэлитиичэскэй баартыйа ыстаабын уонна  “Саха Сирин Аартыката” уопсастыбаннай тэрилтэ сүрүннээһиннэринэн гуманитарнай көмөнү хомуйуу бара турар. Дьон-сэргэ, тэрилтэлэр да сөпкө өйдөөн, ылынан кыалларынан үбүнэн, таҥаһынан, тэрилинэн, бородууктанан, матырыйаалынан өйүүллэр. Хоту, суола-ииһэ суох сиргэ биир дойдулаахтарбыт  көмөтө суох уу, уот ортотугар соҕотох туран хаалыа суохтаахтар. Саха Сирин бары олохтоохторо өйүүллэригэр эрэнэбин. Манна биһиги бары биир санааланан, түмсүөхтээхпит.

Биир эмиэ уустук боппуруоһунан ууга былдьаммыт баайы-дуолу, олорор дьиэни страховкалааһын, хоромньуну толуйар төлөбүрдэри ылыы буолар. Манна биир бастакынан, олорор дьиэ, баай-дуол эрэгэстэрээссийэлэммит, докумуоннаах уонна страховкаламмыт буолуохтаах,  бу ирдэбил курдук туруоруллар. Кыаллыбатах түбэлтэтигэр олохтоох салайыныы уорганнара манна ымпыктаах-чымпыктаах үлэни ыыталлара наада. Ааспыт сылларга маннык түбэлтэҕэ СӨ Бырабыыталыстыбатын кытары быһаччы үлэлээһини уопут курдук ылынан, сөптөөхтүк дьаһаннахха сатанар, -диэн норуот дьокутаата ыҥырар.

ххх

СӨ Ил Дарханын уонна Бырабыыталыстыбатын пресс-сулууспата иһитиннэрбитинэн, бүгүн, от ыйын 27 күнүгэр  СӨ Бырабыыталыстыбатын Бэрэссэдээтэлин бастакы солбуйааччы э.т. Николай Бочков сайыҥҥы халаан боппуруоһунан суһал ыстаап мунньаҕын ыытта. Манна Дьааҥы оройуонун Суордах сэлиэнньэтигэр быһыы-майгы хайдаҕа көрүлүннэ.

Мунньахха бэлиэтэммитинэн, нэһилиэнньэлээх пууҥҥа быыһааччылар бөлөхтөрүн эбии ыытар былааннаахтар. Таһаҕас тиэйбит салгын аала хайыы-үйэ көппүт. Аныгыскы түһүмэҕинэн Суордаахха үлэлииргэ быыһааччылар бөлөхтөрүн тиэрдии буолуоҕа. Билигин бөртөлүөт куттала суох сиргэ түһэрэ быһаарыллар уонна эвакуация ыытыллар түгэнигэр, олохтоохторго куттал суох буолуутун хааччыйыы боппуруоһа көрүллэр.

Дьааҥы улууһун дьаһалтатын иһитиннэриитинэн, 11:00 чаастааҕы туругунан Суордаах сэлиэнньэтин аттыгар уу таһыма 855 сантиметр, кутталлаах бэлиэ — 780 см.  Ууга 60 тиэргэн, ол иһигэр 54 олорор дьиэ баран турар.

Дьону-сэргэни олохтуурга быстах кэмҥэ олорор үс пуун баар. Ол гынан баран, билигин дьон-сэргэ бары аймахтарыгар түспүттэр.

Ылыллыбыт дьаһаллар чэрчилэринэн уу ылар сириттэн-уотуттан 44 төбө сүөһү уонна 136 сылгы үрдүк сиргэ таһаарыллыбыт. Оскуола, оҕо саадын, дьаһалта дьиэтин уонна биэлсэр-акушер пуунун наадалаах маллара-саллара үөһээ этээстэргэ ууруллубуттар.

Итини сэргэ, мунньахха уу түспүтүн кэнниттэн олорор дьиэлэри куурдарга оттук сезонун эрдэ саҕалыырга бэлэмнэнии, ону тэҥэ туруктаах мобильнай сибээһи хааччыйыы боппуруостара көрүлүннүлэр.

Сиһилии: https://www.sakha.gov.ru/news/57676

Хаартыска: "Сардаҥа" хаһыат саайтыттан