Верхоянскайга суукка иһигэр 153 см тахсан 866 см тиийдэ (кутталлаах таһыма 1020 см), Баатаҕайга 4 чаас иһигэр 64 см тахсан 744 см тиийдэ (кутталлаах таһыма 970 см). Дулҕалаах өрүһүгэр Суордаахха уу туһыма 42 см түһэн 773 см тиийдэ, 2 олбуору ылла. Томторго 33 см тахсан 962 см тиийдэ, 8 олбуор, 6 дьиэ ууга бардылар. Сартаҥ өрүһүгэр Бала аннынан 21 см тахсан, 676 см тиийдэ, Үҥкүргэ уу түһэр, 452 см тиийдэ (кутталлаах таһыма 500 см), 3 олбуор билигин да ууга турар. Дьааҥы өрүс салааларыгар: Дулҕалаахха, Сартаҥҥа, Адыаччыга, Боруулаахха чугастааҕы үс хонук устатыгар уу таһыма үрдүүрэ, ардах тохтооботунан халаан уута хаттаан киириитэ сабаҕаланар. Бытантай өрүскэ уу түһэр, ууга барбыт олбуордар босхолоннулар.
Саха Сирин Быыһыыр сулууспатын суһал ыстааба ууга барбыт Дулҕалаах уонна Суордаах бөһүөлэктэригэр биэстии быыһааччыны ыытта. Уу кэлэрэ салҕанарынан сибээстээн, нэһилиэнньэ сорох чааһын эвакуациялаатылар. Дьааҥы улууһун киинигэр Баатаҕайга 24 киһини (ол иһигэр 17 оҕо) тириэрдилиннэ. Дулҕалаахтан 18, Суордаахтан 6 киһи. Быыһааччылар халаантан көмүскүүр тутуулар туруктарын кэтээн көрөллөр уонна нэһилиэнньэҕэ көмө оҥороллор. Синоптиктар билгэлээһиннэринэн, Дьааҥы салааларыгар Дулҕалаахха, Сартаҥҥа, Адыаччыга уонна Боруулаахха халаан хаттаан кэлиитин сабаҕалыыллар, билигин бу өрүстэргэ уу таһыма үрдүү турар. Эбээн Бытантай улууһугар 671 гектар ходуһа ууга баран оттооһун уустугурда.
Өлүөнэ өрүскэ Өлүөхүмэ куоратын аннынан салгыы 27 см түһэн, 787 см тиийдэ ( кутталлаах таһыма 1060 см), Дьокуускайга 40 см түһэн 567 см тиийдэ. Нам улууһугар Сыаҕаннаах аннынан уу таһыма түһэр, Граф Биэрэгэр турбааза 5 тутуута ууга барда, Нам улууһун үрдүнэн 15 га оттонор ходуһа ууга барбыта бэлиэтэннэ.
Сунтаар улууһугар Бүлүү өрүскэ сайыҥҥы халаан уута тахсан билигин төһө хоромньуну таһаарбытын ааҕыы барар. Билигин 85 олбуор уонна 41 олорор дьиэ ууга баран тураллар. Халаан уутун содулугар Бүлүү өрүс кытыла эмпэрэлээн сууллуута бэлиэтэннэ, Кэмпэндээйи, Туойдаах уонна Тэҥкэ сэлиэнньэлэрин икки ардыларыгар тырааныспар сырыыта тохтоото.
Хаартыска СӨ Быыһыыр сулууспата
-
0
-
0
-
0
-
0
-
0
-
0
