Бу туһунан брифиҥҥэ СӨ Экологияҕа, айылҕаны туһаныыга уонна ойуур хаһаайыстыбатыгар миниистирин солбуйааччы, өрөспүүбүлүкэ сүрүн лесничэйэ Андрей Коноплев иһитиннэрдэ.
Ол курдук, минерализованнай балаһалары уонна эрдэ ыытыллыбыт өртөөһүнү куруутун харабыллыыллар. Бэҕэһээ, атырдьах ыйын 3 күнүгэр, Ми-8 бөртөлүөт вездеходтарга уматык-оҕунуох матырыйаалларын аҕалбыт уонна сири-уоту көрбүт.
«Оҕо лааҕырын аттыттан минерализованнай балаһалар тардылыннылар. Куттал тахсар түгэнигэр өртөөһүнү оҥорорго бэлэммит. Лааҕыр үлэлээбэт, онно дьон суох. Нэһилиэнньэлээх пууну көмүскүүргэ уонна баһаар чугаһаабыт кытыыларын төгүрүйэргэ үлэлэр салҕаналлар. Үлэлиир күүспүт тиийэр», — диэн сүрүн лесничэй баар балаһыанньаны быһаарда.
Ааспыт суукка устата Саха Сиригэр түөрт баһаар 1 297 га иэннээх сиргэ умуруоруллубут. Суукка саҕаланыыта уопсайа 387 491 га иэннээх сиргэ 73 ойуур баһаара баар. 84 459 га иэннээх сиргэ алта ойуур баһаарын умуруоруу үлэтэ салҕанар. Ойуур баһаардарын умуруорууга барыта 345 киһи уонна 36 тиэхиньикэ тардылынна.
ххх
Ойуур баһаардара турууларынан быһыы-майгы уустугурбутунан, Авиалесоохрана Ньурба уонна Эдьигээн улуустарыгар эбии үлэһиттэри ыытта.
От ыйын 3 күнүгэр Эдьигээҥҥэ Үөһээ Бүлүү исписэлиистэрэ көмөҕө кэлбиттэрэ. От ыйын 4 күнүгэрНьурба улууһугар 20 киһилээх бөлөх көттө. Ону тэҥэ Мииринэй оройуонугар Бүлүүтээҕи көтөр салаа үлэһиттэрэ тиийиэхтэрэ, уопсайа 60 киһи.
Хаартыска Авиалесоохрана саайтыттан
-
0
-
0
-
0
-
0
-
0
-
0
