Уопсастыба

“Бүлүү улууһа эһигинниин бииргэ” диэн Анал байыаннай дьайыы кыттыылаахтарыгар уонна кинилэр дьиэ кэргэттэригэр улуустааҕы көмө оҥорор пуун 2022 сылтан “Якутия с тобой” диэн өрөспүүбүлүкэтээҕи көмө оҥорор пууну кытары ыкса сибээстээхтик үлэлиир.
Биһиги 2022 сыл балаҕан ыйын 29 күнүгэр Бүлүү куоратын Чапаев уулуссатын 20 б нүөмэригэр В.О.Каратаев аатынан Олоҥхо дьиэтигэр тэриллэн үлэбитин саҕалаабыппыт. 2023 сыл күһүнүттэн “Алгыс” сынньалаҥ киинэ Олоҥхо дьиэтигэр көһөр буолан, биһиги быыстапкалыыр балаҕаҥҥа кэлбиппит. Ийэ дойдуларын көмүскүү сылдьар биир дойдулаахтарбытыгар, Саха Сириттэн сылдьар буойуннарга араас көстүүмнэри, таҥастары тигэн, харыстанар сиэккэлэри өрөн, аадырыстаммыт баһыылкалары ыыталаан, туох кыахпыт баарынан күн бүгүҥҥэ диэри, 4-с сылбытын үлэлиибит.
Пууҥҥа сарсыарда 9 ч эбиэккэ тохтобула суох киэһэ алтаҕа диэри үлэлиибит. Сакаас элбэх буоллаҕына, киэһэ хойукка диэри иистэнэбит.
2025 сылга уопсастыбаннай түмсүүлэр сылы түмүктүүр тэрээһиммитигэр улууспут баһылыга Сергей Винокуров сэртипикээт биэрбитинэн Дьокуускай куораттан бырамыысыланнай дэниллэр иистэнэр икки массыынаны ылбыппыт. Ил Түмэн дьокутаата Александр Гоголев обрелоктуур массыынаны бэлэхтээбитэ. Быйыл Ил Түмэн дьокутаата Егор Григорьев остуоллаах, тигэр уонна тутатына обрелоктаан таһаарар массыынаны бэлэх ууммута. Бу саҥа массыыналарбыт тыастара кыра, онон үлэлииргэ олус сынньалаҥ буолла. Күн аайы таҥас арааһын түргэнник тигэр кыахтанныбыт. Хантараагынан уонна уоппускаҕа кэлбит уолаттарбыт баралларыгар биһиги пууммутуттан тикпит таҥастарбытын, аптечкаларбытын, сиргэ сытарга аналлаах ковриктарбытын, пятиточниктарбытын, наколенниктарбытын, харыстанар сиэккэлэрбитин, харысхаллары, ыраастанар оттору, уопсайа 50-тан тахса араас малы-салы, буортурбат аһылыгы ылан бараллар. Хас биирдии уолга биэрэн ыытар малбыт уопсай ыйааһына 14-20 киилэ буолар. Ону таһынан ый аайы уолаттарбытыгар аадырыстаммыт баһыылкалары (ас, таҥас-сап) дьонунан госпиталларга ыыталыыбыт. Быйыл кулун тутарга солбуйааччым Елена Яковлевна Сивцевалыын Хабаровскай госпиталларыгар, байыаннай чаастарыгар сылдьан кэлбиппит. Саха Сириттэн сылдьар Хабаровскайга үлэлиир волонтер Алена Васильевна Лебедкина уонна кини дьиэ кэргэнэ биһигини буор-босхо дьиэлэригэр түһэрбиттэрэ. Алена Васильевна мээнэ киһи санаммат үлэтин толоро сылдьарыттан сөҕөн-махтайан кэлбиппит.
Бу күннэргэ улахан күүһү таҥас тигиитигэр анаатыбыт. Нэһилиэктэр уопсастыбаннай түмсүүлэрэ тикпит таҥастарын ыыталаан эрэллэр. Уоппускаҕа кэлбит, хантараагынан барар уолаттарбыт иккилии, үстүү көстүүмү ылан, эрдэ кэлбит уолаттар бэйэлэригэр сакаастаан тиктэрэн, махтанан кэтэн бараллар.
Билигин сайыҥҥы көстүүмнэри, футболкалары, ардахтан харыстанар понча, сиргэ сыталларыгар 2 м уһуннаах, 60 см кэтиттээх, иһигэр 1.5 см халыҥнаах пенофоллаах коврик, пятиточник, наколенник, армейскай несессердары тигэ сылдьабыт. Ону сэргэ, Екатерина Герасимовна Алексеева биисэринэн саха былааҕын тиһэн, Валентина Афанасьевна Захарова матырыйаалынан туллук тигэн, иһигэр синтепон уган оҥоро сылдьаллар. Светлана Филипповна Павлова, Зоя Николаевна Михайлова, Ирина Васильевна Волкова госпитальга бааһыран сытар буойуннарбыт атахтарын, илиилэрин анныгар ууруналларыгар наадалаах косточкалар, сыттыктар, бубликтар истэригэр угуллар матырыйаалы кыра гына кырыйан бэлэмнииллэр. Иистэнньэҥ уолбут Семен Семенович Афанасьев 6 араас шевроннары, аптечка, 5 араас көрүҥнээх сайыҥҥы көстүүмнэри барытын бэйэтэ быһан тигэ сылдьар. Иистэнньэҥнэрбит Татьяна Николаевна Петрова, Валентина Афанасьевна Захарова тигэр таҥастарбытын быһан биэрэллэр, элбэх көстүүм, таҥас, коврик, пятиточник, наколенник, пончо тигилиннэ.
Эбиэккэ, түөртүүргэ үлэбитигэр аһыыбыт, ону барытын Мария Николаевна Михайлова астаан, бэлэмнээн аһатар, быыһыгар уолаттарбытыгар анаан ичигэс наскылары баайар. Ону сэргэ элбэх эмтээх, ыраастанар оттору хомуйан, хатаран бэлэмнии сылдьабыт.

Бу күннэргэ хантараагына АБДь-г барар уолбутугар мал-сал биэрэн, ийэлии сыллаан атаардыбыт. Улууспут түмсүүлэрин ийэлэрэ, эбээлэрэ, иистэнньэҥ уолбут, нэһилиэктэр олохтоохторо ис сүрэхтэриттэн, илиилэрин сылааһынан Кыайыыга кынаттыыр санаа күүһэ тиийдин диэн эрэлинэн салайтаран, тикпит таҥастара, өрбүт харыстанар сиэккэлэрэ, оҥорбут харысхаллара уолаттарбытыгар тиийэн күүс-уох эптин, дойдуларын тыынын кынат оҥостон кыайыы көтөллөөх, бары этэҥҥэ эргиллэн кэллиннэр диэн эрэнэ күүтэбит.

Мария Томская, “Бүлүү улууһа эһигинниин бииргэ”
диэн анал байыаннай дьайыы кыттыылаахтарыгар
уонна кинилэр дьиэ кэргэттэригэр улуустааҕы көмө
оҥорор пуун салайааччыта, Бүлүү куоратын бочуоттаах олохтооҕо.

Ааптар хаартыскаҕа түһэриилэрэ.