Күрэсчиттэр икки күн устата «Класс 75 мм» уонна «Класс 200 мм» дьиссипилиинэлэргэ эр дьон, дьахталлар, юниордар уонна юниоркалар икки ардыларыгар күрэхтэстилэр.
Саха Өрөспүүбүлүкэтин бэрэстэбиитэллэрэ үчүгэй бэлэмнээхтэрин көрдөрөн, хамаанданан уонна биирдиилээн көрүҥнэргэ элбэх мэтээли ылары ситистилэр.
Ордук үчүгэйдик иккис күҥҥэ, 200 м кылааска табыллан кытыннылар.
Уһук Илин чөмпүйэнээтигэр эр дьоҥҥо ситиһииилээхтик кытыннылар: Семен Неустроев биирдиилээн бастыыр иһин күрэххэ 3 миэстэ буолла, хамаанданан зачекка Семен Неустроев уонна Герман Никитин чөмпүөйүөн үрдүк аатын ыллылар!
Уһук Илин чөмпүйэнээтигэр дьахталлар куоталаһыыларыгар ситиһииилээхтик кытыннылар: Чэмэлиинэ Иннокентьева биирдиилээн бастыыр иһин күрэххэ 2 миэстэ буолла, хамаанданан зачекка Анастасия Данилова уонна Чэмэлиинэ Иннокентьева иккис миэстэни ыллылар!
Уһук Илин биирдилээн бастыыр иһин күрэххэ, юниордарга педьесталга барытыгар Саха Сирин оҕолоро таҕыстылар: Эдгар Васильев – бастакы, Айвар Прокопьев – иккис, Артем Григорьев – үһүс буоллулар. Оттон хамаанданан киирсиигэ Сахамир Попов, Артем Григорьев иккис миэстэни ыллылар.
Уһук Илин биирдилээн бастыыр иһин күрэххэ, юниоркаларга Екатерина Заболоцкая - бастакы, Айсана Собакина – үһүс миэстэҕэ таҕыстылар. Оттон хамаанданан киирсиигэ Саха Сирин оҕолоро бэркэ кыттан, күүстээх түмүгү көрдөрдүлэр: Айсана Собакина / Сайнара Собакина — 1 миэстэ, Уйгулаана Антоева / Екатерина Заболоцкая — 2 миэстэ.
Саха Сирин хамаандатын бу дьоһун кыайыытынан СӨ инновацияҕа, сыыппараны уонна инфокоммуникационнай технологиялары сайыннарыыга миниистирэ Петр Николаев эҕэрдэлээн, үчүгэй бэлэмнээхтэрин, таһымнара үрдүгүн бэлиэтээтэ. “Дроннар күрэхтэрэ - успуорт эрэ буолбатах. Манна инсэниэрдии толкуй, бырагыраамалааһын, аныгы бэйэтэ көтөр ааллары сылбырҕатык салайыы барыта көрүллэр. Маннык күрэхтэр ыччат билиитин-көрүүтүн хаҥаталлар, аныгы технологиялары баһылыылларыгар көмөлөһөллөр. Бүгүҥҥү кыайыылаахтар, призердар Саха Сиригэр бэйэтэ көтөр ааллары уонна сыыппара технологиятын сайыннарааччы буолуоххут ”, -диэн миниистир эрэлин биллэрдэ.
Хаартыскалар СӨ инновацияҕа, сыыппараны уонна инфокоммуникационнай
технологиялары сайыннарыыга миниистиэристибэтин мах-ханаалыттан
-
1
-
0
-
0
-
0
-
0
-
0
