Билигин сокуон барыла РФ Бырабыыталыстыбатыгар ыытылынна, салгыы официальнай хоруй кэллэҕинэ, парламент көрүүтүгэр киллэриллиэҕэ.
Уларытыыны РФ Үлэ кодексын 145 ыстатыйатыгар киллэрэргэ быһаарыналлар. Бу сокуон ылыллар түбэлтэтигэр судаарыстыбаннай пуондалары, судаарыстыбаннай уонна муниципальнай учреждениелары, ону тэҥэ унитарнай тэрилтэлэри таарыйыаҕа. Дмитрий Гусев быһаарыытынан, кытаанах лимиит олохтонор: дириэктэр уонна кини солбуйааччыларын, кылаабынай бухгалтерын хамнастара атын үлэһиттэр хамнастарынааҕар 5 төгүлтэн ордук үрдүө суохтаах. Билигин бу кээписиэни тэрилтэ тэрийээччитэ быһарар. Ол кэлэктиип иһигэр дохуотунан олус улахан араастаһыыны үөскэтэр.
«Биһиги бүддьүөт эйгэтин туһунан кэпсэттэхпитинэ салайааччылары, быраастары уонна педагогтары эрэ көрөрбүт муҥутах буолар. Дьиҥэр, тэрилтэ үлэтэ элбэх ахсааннаах араас үлэһиттэр сыраларынан, кыһамньыларынан тутуллан турар: саньытааркалар, ньээҥкэлэр, алын персонал, тиэхиньиичэскэй үлэһиттэр. Биллэрин курдук, кинилэр саамай кыра хамнаһы ылаллар. Бу көҕүлээһин, бастатан туран кинилэри көмүскүөхтээх», -диэн дьокутаат «Парламентскай хаһыакка» быһаарда. Бырайыак ааптара эппитинэн, бу миэрэ бүддьүөт үбүн-харчытын ордук сиэрдээхтик тыырарга, үллэрэргэ көмөлөһүөҕэ уонна кыра хамнастаахтар дохуоттарын үрдэтиэҕэ.
«Тэрилтэ бүддьүөттэн, публичнай харчыттан туһанар, үбүлэнэр буоллаҕына, салалта хамнаһа үрдүүрэ, аллараалар хамнастара үрдээбээккэ, соннук кыранан турара сатаммат, оннук быһыы-майгы тахсыа суохтаах. Онон хамнас араастааһытын хааччахтааһын алын персонал туһатыгар үлэлиэхтээх. Үп-харчы муостаны сууйааччыларга, оҕо саадын кырачааннарын, балыыһа ыарыһахтарын көрөччүлэргэ, бүөбэйдэһээчилэргэ, тэрилтэ күннээҕи үлэтин хааччыйааччыларга тиийиэхтээх», -диэн бэлиэтээтэ Гусев.
Хаартыска «Парламентская газета» мах-ханаалыттан
-
2
-
0
-
0
-
0
-
0
-
0
