Бу дьаһал Арассыыйа Үөрэҕин министиэристибэтин саҥа бирикээһинэн олоххо киирэр. Саҥа ирдэбилинэн, үөрэнээччи уруок кэмигэр уонна үөрэх бырагырааматын баһылыыр бириэмэтигэр төлөпүөнү туһаныа суохтаах. Оскуолалар смартфону ханна, хайдах харайалларын бэйэлэрэ быһаарыахтара. Төлөпүөннэри харайарга оннук бары биир дьааһыкка дуу, ячейкаҕа дуу туттарар курдук ирдэбил олохтоммот диэн РФ Үөрэххэ министиэристибэтин эспиэртэ Максим Костенко ТАСС-ка биллэрдэ.  

ххх

Санатан эттэххэ, 2023 сыллаахха Арассыыйа бэрэсидьиэнэ Владимир Путин «Үөрэх туһунан» сокуоҥҥа смартфону бобор туһунан уларытыылары киллэрэр федеральнай сокуоҥҥа  илии баттаабыта. Оттон билигин Үөрэх министиэристибэтин бирикээһэ бу сокуону оскуола ирдэбилигэр уонна үөрэхтээһин быраабылатыгар сөп түбэһиннэрэн олоххо киллэрэр. Маны таһынан, өссө 2022 сыллаахха миниистир  Сергей Кравцов гаджеттары бобууну СанПиН санитарнай нуормаларынан эмиэ быһаара сылдьыбыта.

Бу бобуу туһунан уопсастыбаҕа араас санаа баар. Холобур, Арассыыйа үтүөлээх учуутала, Үөрэх академиятын академига Евгений Ямбург маннык бобуу оннугар, төттөрүтүн, гаджеттары үөрэхххэ сатабыллаахтык туһанар ордук буолуо этэ диэн санаатын эппитэ. Ол эрээри, кини бэлиэтииринэн, ити барыта учуутал талааныттан уонна сатабылыттан тутулуктаах.

Хаартыска эрэдээксийэ архыыбыттан