Кини бэлиэтээбитинэн, ааспыт күннэргэ саппаараапкалыыр пууннар ахсааннарын элбэтии түмүгэр балаһыанньа сыыйа көннөрүллэр. Мунньах кэмигэр Айсен Сергеевич бырабыыталыстыбаҕа уонна уматык хампаанньаларыгар уматыгы тиһигин быспакка аҕалыыны хааччыйалларыгар уонна сапыраапка ыстаансыйаларын үлэтин бэрээдэктииллэригэр сорудахтаата. Кини икки чугастааҕы нэдиэлэҕэ  Дьокуускай куоракка уонна улуустар кииннэригэр уматыгы тириэрдэр, сапыраапкаларга ноҕуруусканы намтатар соругу туруорда.  

Массыыналар сапыраапкаҕа турууларын биир тэҥник тарҕатар инниттэн Дьокуускай куоракка сапыраапка ахсаанын 11-гэ диэри элбэттилэр.  Тэтимин түргэтэтэр инниттэн уу харчынан да, каартанан даҕаны ылаллар. Сапыраапкаларга дьаһалта бэрэстэбиитэллэрэ уонна волонтердар дьуһуурустубалыыллар: суоппардарга ыйан-кэрдэн биэрэллэр, ыстаансыйаҕа ханна ирдэнэр уматык баарынан массыыналары ыыталыыллар. Бу ылыллыбыт миэрэлэр кэтэһии бириэмэтин лаппа кыччаттылар.

“Уматыгы кэмигэр тиэйэн аҕалыы, тириэрдии, баар кээмэйи сөптөөхтүк тарҕатыы уонна сапыраапка ахсаанын элбэтии улахан суолталаах”, – диэн Айсен Николаев бэлиэтээтэ.

Уматык тиһигин быспакка кэлэ турарын туһугар федеральнай биэдэмистибэлэри уонна оҥорон таһаарааччылары кытта күннэтэ сүрүннээһин үлэ барар. Инники турар соругунан ньиэби оҥорон таһаарар собуоттартан тиэйэн аҕалыыны түргэтэтии уонна цистерна-вагоннары кэмигэр биэрии буолар. Ил Дархан тириэрдии хас биирдии түһүмэҕин хонтуруолга ылалларыгар сорудахтаата: төһө кээмэйдээх тиэллибититтэн саҕалаан өрөспүүбүлүкэҕэ тиийэн кэлиитин болдьоҕор тиийэ.

Ураты болҕомтону транзитнай хайысхалары киллэрэн туран, тырааныспарка улахан ноҕуруускалаах нэһилиэнньэлээх пууннарга уураллар. Биисинэһи өйүүр инниттэн табаар кирэдьиитин көрүү быраактыката салҕаныаҕа. Бу, хампаанньалар элбэх ыстаансыйаны үлэлэтэллэригэр уонна саппааһы сөптөөхтүк үллэрэллэригэр көмөлөһүөҕэ.

Балаһыанньаны кэтээн көрүү уонна уматыгы тириэрдии күннээҕи эрэсиим быһыытынан барар уонна эрэгийиэҥҥэ уматык ырыынагын үлэтэ оннун олоччу булуор диэри ыытыллыаҕа. Бу туһунан Ил Дархан уонна Бырабыыталыстыба пресс-сулууспата суруйар.

Хаартыска Айсен Николаев МАХ-ханаалыттан