Угуйукка анаан уонна информацияны биэрэр матырыйаалларга бу логотип эбии биэрсийэтэ оҥоһуллубут. Киин бааҥҥа бэлиэтииллэринэн, бу харчы толору үлэлээн бардаҕына, бары эпэрээссийэлэр Арассыыйа олохтоохторугар босхо оҥоһуллуохтара.
Санатар буоллахха, РФ Бэрэсидьиэнэ Владимир Путин: «Билигин аныгыс хардыынан экэниэмикэҕэ, хаһаайыстыбаннай үлэҕэ уонна үп-харчы эйгэтигэр сыыппара солкуобай толору киэҥ эйгэҕэ киириитигэр көһүөхтээхпит», — диэн кини экэниэмикэ боппуруостарынан сүбэ мунньахха иһитиннэрбитэ.
Владимир Путин ордук болҕомтотун 2023 сылга Киин баан үлэҕэ киллэрбит пилотнай бырайыагар уурбута. «Дьиҥинэн, бу биһиги национальнай харчыбыт өссө биир көрүҥэ буолар. Уратыта диэн биирдиилээн дьон уонна урбаанньыттар ханнык да баантан тутулуга суох сыыппара солкуобайы туһаныахтарын сөп», — диэн судаарыстыба баһылыга бэлиэтээбитэ.
Билигин бу бырайыакка 11 куораттан 12 баан, 600 биирдиилээн дьон уонна 22 тэрилтэ кыттар. « Бырайыак саҕаланыытыгар бу тиһиккэ 27 тыһ. тахса харчы ыытыыта ааспыта, ону тэҥэ 7 тыһ. тахса табаар уонна өҥө төлөбүрэ оҥоһулубута», — диэн Владимир Путин иһитиннэрбитэ.
Бэлиэтээн эттэххэ, “сыыппара” уонна “электроннай” диэн биир өйдөбүлү араастаан ааттааһыҥҥа майгынныыр эрээри, “сыыппара солкуобай” олох туспа айылҕалаах өйдөбүл. Сыыппара харчы биир сүрүн уратыта – хас биирдии сыыппара солкуобай туспа хонтуруолланар кыахтаах.
Москубаҕа буолбут тэрээһини кытта даҕатан, Дьокуускайга Ил Дархан Айсен Николаев Саха Сирин судаарыстыбаннай салайыы, социальнай эйгэ, экэниэмикэ салааларыгар сыыппаралаах трансформацияны бырайыактыыр офистар мунньаҕын ыыппытын кэрэхсиэххэ сөп. Кини сыыппара технологиятын салгыы киллэрии улахан суолталааҕын санатан:“Сыыппара трансформациятын көҕүлээһиҥҥэ саҥа көрүүлэри уонна садааччалары быһаарыахха наада. Онно судаарыстыбаннай былаас уонна экэниэмикэ салаалара төһө сиппиттэрин быһаарар үлэ түмүгэр тирэниллиэхтээх”, – диэбитэ.
Айсен Николаев, бырайыактыыр офис саҥа структуратын бигэргэппитэ, өрөспүүбүлүкэ сыыппаралаах трансформация салайааччытынан Бырабыыталыстыба Бэрэссэдээтэлин солбуйааччытын Анатолий Семеновы анаабыта.
Ил Дархан бэлиэтээбитинэн, экэниэмикэ, социальнай эйгэ уонна судаарыстыбаннай салайыы сыыппаралаах трасформацияны оҥоһуу өй уонна геоинформационнай технология дааннайдарыгар олоҕурбут салайыыны киллэрэн ситиһиэххэ сөп. Айсен Николаев болҕомтотун эрэгийиэн сыыппаралаах трансформациятыгар үлэһиттэри бэлэмнээһиҥҥэ уурбута.
Мунньахха VIII аан дойдутааҕы “Азия оҕолоро” успуорт оонньууларыгар араас быһылааннары дьаһайар туһаныллыбыт үлэ уопутун тула кэпсэппиттэрэ. Ол курдук, маннык киэҥ далааһыннаах тэрээһиҥҥэ тэрийэр кэмитиэт, ЦУР, мэдиссиинэ тэрилтэлэрэ, бэрээдэги уонна куттала суох буолууну хааччыйар уорганнар үлэлэригэр бастакытын таһыттан кэтээн көрүүнү туһаннылар. Онон үлэ тэтимирэн, буолбут быһылааннар 10 мүнүүтэттэн саҕалаан, 3 чааска диэри кэмҥэ уталыппакка быһаарылыннылар.
Мунньах түмүгэр Айсен Николаев сыппаралаах трансформация судаарыстыбаннай салалтаҕа, социальнай эйгэҕэ, экэниэмикэҕэ Стратегиятын саҥардарга, ону таһынан араас быһылааннары дьаһайыы саҥа систиэмэтин кэҥэтэн, эрэгийиэн судаарыстыбаннай информационнай платформаларын кытта ситимнээн үлэҕэ киллэрэргэ сорудахтаабыта.
Хаартыска ТАСС МАХ-ханаалыттан
-
0
-
0
-
0
-
0
-
0
-
0
