Саха Сирэ дойдуга саамай элбэх ойуурдаах эрэгийиэнинэн биллэр. Биһиэхэ ойуур өрөспүүбүлүкэ сирин-уотун 80 %-ын ылар. Бу сыаната биллибэт баайы-дуолу көрүү-истии эппиэтинэһин эһиги илдьэ сылдьаҕыт. Эһиги үлэҕит эр санааны, айылҕаҕа тапталы эрэйэр улахан миссия буолар.
Быйылгы сыл ойуур салаатыгар кэккэ үчүгэй түмүктэрдээх. Лесничестволар уонна баһаары утары охсуһар сулууспалар бииргэ үлэлээһиннэрин түмүгэр, ойуур баһаарын ахсаана аҕыйаата, уоту умуруоруу көдьүүһэ үрдээтэ, суһалсыйда. Өрөспүүбүлүкэ тыаны чөлүгэр түһэриигэ Арассыыйаҕа инники күөҥҥэ таҕыста: бу хайысханан үлэ 165 000 гектарга ыытылынна, былаан 8 000 гектарынан аһары толорулунна. Бу эһиги сыралаах үлэҕитинэн ситиһилиннэ.
Олохтоох лесопитомниктар толору кыахтарынан үлэлииллэр. Саха Сирин тыйыс усулуобуйатыгар сөп түбэһэр мастары ууһатан олордуу кэскилэ улахан. Махтал истиҥ тыллара бэтэрээннэргэ ананар. Бүгүҥҥү ситиһиилэр тирэхтэрин эһиги уурбуккут, эдэр ыччакка бэйэҕит уоппуккутун, айылҕаҕа харыстабыллаах сыһыаҥҥытын тиэрдэҕит. Күндү доҕоттор, эһиэхэ чэгиэн доруобуйаны, үлэҕитигэр ситиһиилэри баҕарабын.
Ил Түмэн сир сыһыаннаһыыларыгар, айылҕа ресурсаларыгар уонна экологияҕа сис кэмитиэтин бэрэссэдэтэлэ Андрей Находкин.
-
0
-
0
-
0
-
0
-
0
-
0
