Нэһилиэктэри, уһаайбалары, дьиэни-уоту чөлүгэр түһэрэргэ устудьуоннар тутар этэрээттэрэ миэстэтигэр тиийэн үлэлээтэ. Сайыҥҥы халаан уутун кэмигэр Саха Сиригэр 10 муниципальнай тэриллиигэ 17 нэһилиэк эмсэҕэлээтэ, 799 тиэргэни уу ылла. Ыксаллаах быһыы-майгы Хаҥалас, Томпо, Уус Маайа, Үөһээ Дьааҥы, Кэбээйи уонна Сунтаар улуустарыгар биллэриллибитэ.
Халаан уутун сэрэтэргэ бу саас өрүс 92 учаастагар мууһу хараардыы, эрбээһин үлэтэ ыытыллыбыта. 212 гидрологическай пуост халаан уута хайдах ааһан иһэрин кэтээн көрбүтэ. Ол да буоллар, айылҕа алдьархайын тута тохтотор уустук.
Үөһээ Дьааҥы улууһун халаан уутуттан эмсэҕэлээбит тыһыынча кэриҥэ олохтоохторугар биир кэмнээх материальнай көмө быһыытынан, СӨ Бырабыыталыстыбата 14,5 мөл. солк. харчыны ыытыаҕа.
Ону таһынан, норуот дьокутаата Сергей Сивцев биир дойдулаахтарыгар ыарахан кэмҥэ көмө оҥорорго хара маҥнайгы күнүттэн сүүрэн-көтөн, дьону түмэ тарта. Ааспыт нэдиэлэҕэ Үөһээ Дьааҥы улууһугар гуманитарнай көмөнү хомуйар ыстаапка үлэлээбит волонтердары чиэстээтилэр.
«Көхтөөх актыбыыстар уонна дьон кыһалҕатыттан туора турбат аһыныгас сүрэхтээх айыы дьоно ыйтан ордук кэмҥэ төгүрүк суукка кэлбит көмөнү, аһы-үөлү, туттар тэрили суулаан, халаан уутуттан эмсэҕэлээбиттэргэ ыыттылар. Кинилэргэ Үөһээ Дьааҥы улууһун баһылыгын, СӨ Бырабыыталыстыбатын, Ил Түмэн махтал суруктарын, грамоталары туттардылар.
Уопсайа 23 туонна гуманитарнай көмө, 3,5 мөл. солк. харчы хомулунна, ону тутуу матырыйаалын атыылаһарга ыыттылар. Хас биирдии көмөлөспүт үтүө санаалаах, сайаҕас сүрэхтээх дьоҥҥо махталбытын тиэрдэбит», — диэн Ил Түмэн дьокутаата Сергей Сивцев социальнай ситимигэр таһаарда.
Хаартыска: Сергей Сивцев социальнай ситимиттэн.
-
0
-
0
-
0
-
0
-
0
-
0
