Өр кэмҥэ түһэрсиллибит дуогабарынан НДС нолуогун саҥа ньыманан ааҕыахтара. Ол туһунан 293 №-дээх 2026 с. атырдьах ыйын 4 күнүгэр ылыныллыбыт сокуон олоххо алтынньы 1 күнүттэн киирэр. Дуогабары түһэрсибит кэнниттэн түһээн сокуона уларыйдаҕына саҥа быраабыланы туттуохтара. Маннык түгэҥҥэ өҥөнү оҥорооччу НДС төлүөхтээх, оттон атыылаһааччы түһээн көҕүрэтиитин (вычетын) кыайан туттубат.
Өскөтүн икки өрүттэр сыаналарын болдьоспотохторуна, дуогабардарын көтүрбэтэхтэринэ, уларыйыы тахсар түгэнигэр хайдах дьаһаналларын суруйбатахтарына, НДС анал пуормуланан ааҕыллар, онуоха хантараакка ыйыллыбыт сыана тирэх буолар.
Хомунаалынай төлөбүр үрдээтэ
РФ Бырабыыталыстыбатын 3413-р №-дээх 2025 с. сэтинньи 25 күнүгэр тахсыбыт дьаһалынан, алтынньы 1 күнүттэн хомунаалынай өҥө тарыыба эрэгийиэннэргэ 8-22%, дойду үрдүнэн 9,9% үрдээтэ. Ол эрэн квитанцияҕа төлөбүр булгуччу ити суумаҕа үрдүүр диэн буолбатах, түмүк суума дьиэ кээмэйиттэн, төһө уоту-ууну, сылааһы туттубуттарыттан уонна олохтоох былаас быһаарыытыттан тутулуктаах.
Харчыны уонна бириэмэни харыстыырга
Сэтээтэллэр испииһэктэрин муниципалитеттар официальнай саайтарыгар таһаарар буолуохтара. Ол туһунан 256 №-дээх федеральнай сокуон 2026 с. от ыйын 27 күнүгэр ылыныллыбыта алтынньы 25 күнүттэн олоххо киирэр.
Итинник испииһэги оройуоннааҕы суукка уонна субъект үрдүкү ситэриилээх былааһыгар кумааҕынан, эбэтэр электроннай көрүҥүнэн хайдах ыыталларын муницпалитеттар бэйэлэрэ талыахтара.
Урут маннык үлэ бюрократията элбэх этэ, тыһыынчанан лииһи бэчээттээн тарҕатарга бүддьүөт үтүмэннээх харчыта ороскуоттанара, оттон дьон кэккэ биричиинэнэн испииһэктэн тахсыахтарын баҕардахтарына, тута сайабылыанньа биэрэллэрэ кыаллыбата атахтыыра. Саҥа сокуон ону судургутан, харчыны уонна бириэмэни харыстаан, сыыппараҕа көһөргө кыах биэрэр. Ол туһунан «Парламентская газета» тустаах саайта иһитиннэрэр.
Ааптар хаартыскаҕа түһэриитэ.
-
0
-
0
-
0
-
0
-
0
-
0
