Алтынньы 17 күнүгэр Ньурба улууһун Сүлэ нэһилиэгэр Саха Өрөспүүбүлүкэтин Ийэлэрин күнүгэр анаммыт, ийэ уонна оҕо ураты ситимин, дьиэ кэргэн үтүө үгэстэрин уонна ас астыыр үөрүйэхтэрин арыйар «КЭРЭ СИТИМ – ИЙЭ ОҔОТУНААН» диэн кулинарнай күрэс бэрт сэргэхтик ааста. Тэрээһини «Айыы Тайбыт» култуура киинин уонна олохтоох бибилэтиэкэ үлэһиттэрэ үрдүк таһымнаахтык тэрийэн ыыттылар.
Күрэскэ барыта үс ийэ оҕолорунаан көхтөөхтүк кытыннылар. Кинилэр бэйэлэрин билиһиннэриигэ, «Биһиги бастыҥ бүлүүдэбит» дьиэтээҕи ас күрэҕэр, «Интеллектуальнай винегрет» сытыы өйдөөхтөр, «Хараҕынан быһа холоон» уонна түмүктүүр «Сандалы» түһүмэхтэргэ күрэстэстилэр. Кыттааччылар бары да мааны асчыт буоланнар, бэлэмнээбит астара бииртэн биир минньигэс буолан дьүүллүүр сүбэни уонна көрөөччүлэри сөхтөрдө.
Дьүүллүүр сүбэ быһаарыытынан бастакы үрдэли «Сахалыы куттаах кэрэ ситим» анал ааты Юлия Фелегонова кыыһынаан Алисиялыын (Сүлэ нэһилиэгэ), иккис үрдэли «Сатабыллаах кэрэ ситим» анал ааты Марианна Петрова кыыһынаан Аэлиталыын (Сүлэ нэһилиэгэ), үһүс үрдэли «Минньигэс астаах кэрэ ситим» анал ааты Ольга Унарова уолунаан Тимурдуун (Ньурба куората) ылары ситистилэр.
Маны таһынан, көрөөччүлөр истиҥ биһирэбиллэрин Марианна Петрова кыыһынаан Аэлиталыын ыларга тигистилэр. Күрэх бары кыттааччыларыгар анал дипломнар уонна сыаналаах бириистэр туттарылыннылар.
Киэһээҥҥи тэрээһини Дмитрий Слепцов уус-ураннык иилээн-саҕалаан ыытта. Бырааһынньыктааҕы кэнсиэри «Сарыада» ырыа ансаамбыла (салайааччы Снежана Черноградская), Раиса Иванова, Наталья Винокурова, Мария Кюдякова, Александр Винокуров уонна Дмитрий Слепцов бэйэлэрин ылбаҕай ырыаларынан киэргэттилэр.
Күн күбэй ийэлэрбитин, амарах эбээлэрбитин Ийэлэр күннэринэн ис сүрэхтэн итиитик-истиҥник эҕэрдэлиибит! Орто дойду олоҕун эриэккэһэ эһиэхэ эҥээрдэстин, дьол-соргу тосхойдун, үөрүү-көтүү үрдээтин! Баҕарабыт эһиэхэ сир үрдүгэр баар бары кэрэни, үлэҕитигэр үрдүк ситиһиилэри уонна кытаанах чэгиэн доруобуйаны! Оҕолоргут тустарыгар ахсаабат кыһамньыгыт, сылаас тапталгыт уонна муударай сүбэҕит иһин барҕа махтал! Ол туһунан Ньурба хаһыат саайта суруйар.
Хаартыска: Ньурба хаһыат саайта.
-
0
-
0
-
0
-
0
-
0
-
0
