Тарбахтарын иминэн байаан кылбачыгас тимэхтэрин баттыалаан, кэрэ дьүрүскэни таһаарар, кини нарын, ардыгар лыҥкынас тыаһыгар тартаран ис сүрэхтэриттэн оонньуур дьон тыйаатыры толордулар.
Бүгүҥҥү түһүлгэҕэ Тааттаттан, Чурапчыттан, Мэҥэ Хаҥаластан, Намтан, Хаҥаластан, Бүлүүттэн, Дьокуускай куораттан, орто, үрдүк анал үөрэх кыһаларыттан барыта 89 киһи кэлбит, биир киһи кэтэхтэн кыттыыны ылла.
Бу түһүлгэҕэ саха норуотун адьас былыргы өбүгэтин, түүр омуктан төрүттээх кыргыс уонна долган уолаттарын кытта көрсөн кэпсэттим. Уолаттар иккиэн Арктикатааҕы култуура уонна ускуустуба судаарыстыбаннай институтугар үөрэнэллэр эбит.
-- Оскуолаҕа үөрэнэрбэр анаан дьарыктамматаҕым, ол эрээри, аккардеон тыаһа күүскэ абылаан, хайдах эрэ ис-испиттэн кини тыаһыгар уйдарар баҕам баһыйан, олохтоох училищеҕа үөрэнэ киирбитим. Биир үтүө күн училищебытыгар Саха сириттэн институт преподавателэ кэлэн институт туһунан кэпсээбитэ, үөрэнэ ыҥырбыта. Хайдах эрэ санаабар ыраах сир ыҥырар-угуйар курдук өйбөр-санаабар киирэн, манна үөрэнэ кэлбитим. Тыйыс тымныы кыһыннаах сир төһө да ыарахаттары үөскэттэр, баҕа санааны толорор күүс күннэтэ баһыйар. Аккардеон умсулҕанын толору ылыныыбар, баһылыырбар кыах биэрбит тапталлаах төрөпүттэрбэр, училищеҕа үөрэппит преподавателбэр Жанибек Ботобековка уонна институтум преподавателлэригэр куруутун махтаныам, -- диир Кыргызтан иккис бөдөҥ уонна кырдьаҕас Ош куоратыттан сылдьар Мухаммед Артыкбаев.
Оттон аҕыйах саҥалаах долган уола Ярослав Сахатин Дудинка куораттан сылдьар. Оскуола сааһыгар муусука оскуолатыгар Людмила Гисска, Норильскайдааҕы музыкальнай кэллиэскэ Евгений Чернышевка уһуйуллубут.
-- Кэллиэс кэнниттэн салгыы Красноярскайга үөрэниэхтээҕим, ол эрээри АГИКИ уһуйааччыта Владимир Боярскайы кытары биир кэпсэтиим олохпун уларыппыта, -- диэн кэпсээтэ Ярослав.
Байаан угуйар, умсугутар тыаһа омуктан тутулуга суох, киһини иэйиигэ кынаттыырын бу түһүлгэ көрдөрөр.
-
9
-
3
-
0
-
0
-
0
-
0
