Бас билии киэбиттэн тутулуга суох, Абый, Аллараа Халыма, Булуҥ, Кэбэйи, Усуйаана улуустарыттан уонча хаһаайыстыба, биирдэм тэрилтэлэр балык арааһын тардан кэбистилэр. Тэрийээччилэр этэллэринэн, дьаарбаҥкаҕа 20 туонна балык уонна балык бородууксуйата аҕалыллыбыт.
Мииринэй улууһуттан «Чернышевскайдааҕы балык собуота» хааччахтаммыт эппиэтинэстээх тэрилтэ аан бастаан кэлбит. Өрөспүүбүлүкэҕэ табаарынай балыгы ууһатан иитиигэ идэтийэр үс хаһаайыстыба баарыттан саамай бөдөҥнөрө, «кырдьаҕастара» бу собуот буолар. Сыллата уонунан мөлүйүөн устуука балык, ол иһигэр, тууччах, чыыр ыамаларын, Өлүөнэ уонна Анаабыр өрүстэргэ ыытар. Водохранилищеҕа табаарынай балыгы ууһатар.
– Биһиги Сибиир хатыыһын уонна форель, чыыр, уомул, тууччах, муксуун балыктары ууһатан иитэбит. Олортон олохтоох балык саҥа көрүҥүн, форель балыгы, 2025 сыл бүтүүтүттэн атыыга таһаарбыппыт. Былырыын 11 туоннаны сүрүннээн бэйэбит оройуоммут иһинэн батарбыппыт, быйыл 8 туоннаны батардыбыт, былааммыт 15 туонна. Дьокуускай дьаарбаҥкатыгар бу бастакы кыттыыбыт, 500 киилэни аҕалбыппыт. Форель тоҥнуу эмиэ сиэнэр буолан, интэриэһи ордук тарта быһыылаах, амсайыыга диэн кыспыт балыкпыт тута бүттэ, – диэн кэпсээтэ балык собуотун дириэктэрэ Василий Черепанов.
Ону таһынан чугас улуустар хаһаайыстыбалара үүт ас арааһын, ынах сүөһү, убаһа, сылгы, сибиинньэ этин уонна сир аһын эгэлгэтин аҕалан атыылыыллар. Дьоннор эти атаҕынан ылан баран сонно тута эрбэтэллэр, тоҥмуттар-хаппыттар, аччыктаабыттар сылаас балааккалаах кафеҕа киирэн ирэ-хоро үссэнэллэр, итии балык миинин иһэллэр.
Хаартыска: Анна Сергучева уонна ааптар түһэриилэрэ.
-
1
-
0
-
0
-
0
-
0
-
0
