Тыа хаһаайыстыбатын уонна ас-үөл бэлиитикэтин министиэристибэтин чахчытынан, табаны иитиигэ 21 улууска бас билии көрүҥүттэн тутулуга суох, 118 хаһаайыстыба идэтийэр. Алтынньы 8 күнүнээҕи чахчынан, олорго барыта холбоон, 177 047 таба баар, 1022 киһи (904 табаһыт, 118 232 чуумсук) үлэлиир.
– Быйыл барыта 37 309 тугут ылылынна, былырыын бу көрдөрүү 35 833 этэ, улахан табаны чөл тутуу 86 %-ҥа тэҥнэстэ. Хаһаайыстыбалар хараал үлэтин ыыта сылдьаллар, табалары түмэн ааҕаллар, саастарынан наардыыллар, бэтэринээринэй эмтиир-сэрэтэр дьаһаллары ыыталлар. Билигин кинилэр иннилэригэр кыһыҥҥы эрэсиимҥэ киирэн, эккэ туттуллар табалары наардаан дьаһайар уонна иитиигэ хаалар ыччат табалары маркировкалыыр, чиип кэтэрдэр сорук турар. Билиҥҥитэ 157 618 таба, ол эбэтэр улахан таба 100 %-а уонна Анаабыр, Өлөөн улуустарыгар ыччат таба барыта маркировкаланна, атыттар оҥоро сылдьаллар, -- диир министиэристибэ хотугу төрүт салааларга отделын салайааччы Иннокентий Баланов.
Салааҕа силиэксийэлиир-племенной үлэ былааннаахтык ыытыллар. Арассыыйа үрдүнэн таба түөрт боруодата бигэргэммититтэн, үһүн (эбээн, эбэҥки уонна чукча боруода табалары) биһиги хаһаайыстыбаларбыт иитэллэр.
«Тыа хаһаайыстыбатын сайыннарыы уонна тыа хаһаайыстыбатын бородууксуйатын, сырьетун итиэннэ ас-үөл ырыынагын сүрүннээһин судаарыстыбаннай бырагырааматын» чэрчитинэн, быйыл 1,2 млрд солк. көрүллүбүтэ. Итинтэн 39,2 мөл. солк. – матырыйаалынай-тиэхиньиичэскэй баасаны хаҥатыыга (олорор дьиэлэри, бүтэйдэри тутууга, тиэхиньикэлэри атыылаһыыга), 28,3 мөл. солк. – ыччат табаны атыылаһыыга, тиэйиигэ-таһыыга туһанылынна. Ол курдук, боруоданы тупсарарга уонна аҕыйах табалаах хаһаайыстыбалары табанан хааччыйар үлэ чэрчитинэн, Абый, Эдьигээн уонна Нерюнгри улуустарын хаһаайыстыбалара холбоон 1 500 табаны атыыластылар.
Ыстаадаларга улахан кутталы оҥорор адьырҕа кыыллар ордук хайалаах сирдэргэ, Алдан, Булуҥ, Дьааҥы, Кэбээйи, Нерюнгри уонна Өймөкөөн улуустарыгар элбэхтэр. Сыл саҕаланыаҕыттан барыта 356 бөрө дьакыйылынна.
Хаартыска: Эрэдээксийэ архыыба.
-
0
-
0
-
0
-
0
-
0
-
0
