Манна аналлаах сокуон бырайыагын РФ Федерациятын Сэбиэтэ бүгүн, муус устар 14 күнүгэр, көрөр. Сокуоҥҥа этиллэринэн, дьон нолуок уорганнарын кытта интэриниэт сервиһин көмөтүнэн («Личный кабинет налогоплательщика для физических лиц») ханнык да докумуону биэрбэккэ, көрдөрбөккө, тустаах сайабылыанньаны биэрэр кыахтаныахтара. Нолуок иниспиэксийэтин исписэлиистэрэ сайабылыанньалаах киһи нолуогун төннөрөр (налоговый вычет) бырааптааҕын, бырааба суоҕун бэйэлэрэ бэрэбиэркэлиэхтэрэ.
РФ Госдуматын Бэрэссэдээтэлэ Вячеслав Володин «Коронавирус дьаҥа сыыппара технологиятын күүскэ сайыннарыахтаахпытын чуолкайдык итэҕэттэ. Маҥнайгы уочарат дьон хайа баҕарар балаһыанньаҕа судаарыстыбаннай өҥөнү туһанара лаппа судургутуйуохтааҕын ситиһиэхтээхпит», - диэн санаатын эппит.
Норуот дьокутаата, Ил Түмэн бүддьүөккэ, үпкэ, нолуокка уонна сыана бэлиитикэтигэр, бас билии боппуруостарыгар кэмитиэтин бэрэссэдээтэлин солбуйааччы Нюргуяна Захарова: “РФ Бырабыыталыстыбата Госдумаҕа дохуоттан киирбит нолуоктан харчыны төннөрүү (вычет) бэриллиитин бэрээдэгин уларытар, судургутутар туһунан сокуон бырайыагын оҥорон киллэрдэ. Биллэрин курдук, нолуоктан харчыны төннөрүүнү элбэх киһи туһанар. Олохтонуллубут бэрээдэк быһыытынан сайабылыанньалаах нолуок иниспиэксийэтигэр дэкэлэрээссийэни уонна дьиэ-уот атыыласпытын, ипотека кирэдьиитин ылбытын уонна төлөөбүтүн, Росреестргэ регистрациялаппытын туһунан докумуоннары туттарар эбит буоллаҕына, саҥа бэрээдэгинэн сайабылыанньаны эрэ суруйар, онтон атын докумуоннары нолуок иниспиэксийэтин исписэлиистэрэ бэйэлэрэ хомуйар буолуохтара. Ол курдук, былырыыҥҥыттан Уһук Илиҥҥи 2 %-наах ипотека кирэдьиитинэн туһаммыт эдэр ыаллар саҥа сокуон олоххо киирдэҕинэ, нолуок иниспиэксийэтин интэриниэт-сервиһин көмөтүнэн тустаах сайабылыанньаны эрэ биэрэн, нолуоктарыттан сорҕотун туһанар кыахтаннылар”, -- диэн санаатын үллэһиннэ.
-
0
-
0
-
0
-
0
-
0
-
0
