Ол туһунан Национальнай мэдиссиинэ киинин оҕото суох дьахтар төрүүрүгэр көмөлөһөр аныгы репродуктивнай технология салаатын сэбиэдиссэйэ Айталина Афанасьевна Семенова билиһиннэрдэ.
Кини Дьокуускайдааҕы Медицинскэй институту бүтэрэн баран Москва куоракка Арассыыйатааҕы мэдиссиинискэй академияҕа ординатураҕа үөрэммитэ.
1990-ус сылларга дойдуга эндокринологическай гинекология диэн саҥа хайысха аһыллыбыта. Ону интэриэһиргээн, Айталина Афанасьевна дириҥник хасыһан туран үөрэппитэ, идэтин бу салааны кытта ситимнииргэ быһаарыммыта. Оччолорго ЭКО-ну Москваҕа саҥа саҕалаан эрэр кэмнэрэ этэ.
Мэдиссиинэ киинигэр Киһи репродукциятын клиниката аан бастаан 1998 с. аһыллыбыта. Айталина Афанасьевна ординатураны бүтэрэн, ыал буолан, оҕолонон баран 2000 с. үлэлии кэлбитэ. Ол кэмҥэ кыайан оҕоломмот дьон доруобуйатын чинчийэн көрөллөрө, туох эмит мэһэйдиир төрүөтү буллахтарына ону туоратарга, эмтииргэ үлэлииллэрэ.
Холобур, лапараскопическай эппэрээссийэ оҥороллоро, гормуон кэһиллибитин чөлүгэр түһэрэллэрэ, тымныйыыны эмтииллэрэ. ЭКО-ну маассабайдык ОМС тиһилигэр киириэҕиттэн 2014 с. босхо оҥороллор, ол туһунан кини саас-сааһынан кэпсээтэ:
Оҕото суох ыал элбээбит курдук
- Мин өссө оҕо сааспыттан акушер-гинеколог идэтин баһылыыр баҕа санаалааҕым. Ийэм терапевт-быраас, онтон уолум кардиолог. Икки оҕолоохпун, уоллаах кыыс. Кыыһым эдэр, өскөтүн кыайан оҕоломмотоҕуна, ЭКО-ну сүбэлиэм этэ даҕаны, маннык боппуруоһу киһи бэйэтэ быһаарар. Биһиэхэ көрдөрө кэлбит дьоҥҥо хайдах көмөлөһүөххэ сөбүн кэпсиибит, онтон сүбэлэһэн баран ыаллар ханнык ньыма барсарын бэйэлэрэ талаллар.
Кыайан оҕоломмот буолуу былыр даҕаны, билигин даҕаны баар көстүү. Аныгы олох сайдан, дьахтар төрүүр сааһа быдан улаатан биэрдэ, ол иһин оҕото суох ыал элбээбит курдук көстөр. Урут эбээлэрбит-хос эбээлэрбит 16-17 саастарыттан төрүүллэрэ уонна 35-гэр диэри уонтан тахса оҕолоноллоро. Айылҕа сокуонунан оннук буолуохтаах даҕаны.
ЭКО көдьүүһэ сааскыттан тутулуктаах
- Биллэн турар, оҕо үөскээбэт төрүөтэ үгүс. Өскөтүн кэргэн тахсыбыт дьахтар биир сыл устата хат буолбатаҕына, булгуччу гинеколог бырааска көрдөрүөхтээх. 35-ин ааспыт дьахтар хаһан оҕо үөскүүрүн кэтэһэн олордоҕуна, бириэмэ түргэнник элэҥнээн ааһар. Эдэр дьахталларга ЭКО түргэнник сатанар, төһөннөн сааһыран истэҕиҥ аайы көдьүүһэ намтыыр.
Күн бүгүн өрөспүүбүлүкэ үрдүнэн 2000 кэриҥэ дьахтар учуокка турар. Кинилэртэн быһа холоон, 30-35% ЭКО көмөтүнэн оҕолонно. Аныгы мэдиссиинэ төһө даҕаны сайдыбытын иһин, аптаах маһынан даҕайар курдук дьахтар төрөөн испэт.
ЭКО көдьүүһэ сааскыттан быһаччы тутулуктаах. Холобур, 35 диэри саастаах эдэр кыргыттар ЭКО көмөтүнэн 45-50% ийэ буолар үрдүк дьолу билэллэр. 35 ааспыт дьахталлар 25-30%, 40 ааспыттар баара-суоҕа 15% хат буолан, төрүүр кыахтаналлар.
Сааһыран истэҕиҥ аайы яйцеклетка хаачыстыбата мөлтүүр, араас итэҕэстээх буолуон сөп. Дьахтар төрүүр, ийэ-аҕа ууһун тэнитэр көмүс кэмэ бэрт кылгас, ону мүччү тутумуохха наада.
-
0
-
0
-
0
-
0
-
0
-
0
