-Былырыын доруобуйа харыстабылыгар сис кэмитиэт үс сокуону тиһэх ааҕыыга ылынна. Ону таһынан, үлэбит хайысхатынан Судаарыстыбаннай Дууманы, Федерация Сэбиэтин кытта үлэлэһэбит.
Ааспыт сылга 13 мунньах, 4 төгүрүк остуол ыытылынна, холобур, Ленскэйгэ бара сылдьан Мииринэй, Өлүөхүмэ, Сунтаар муниципальнай тэриллиилэрин бэрэстэбиитэллэрин, кылаабынай быраастары, үөрэх, доруобуйа харыстабылын, СӨ ТФОМС үлэһиттэрин кытта көрсөн оскуолаҕа үөрэнэр оҕолору мэдиссиинэ көмөтүнэн хааччыйыы туһунан дьүүллэстибит.
Мэҥэ Хаҥаласка киин, илин эҥэр улуустар, Ньурба дьаһалтатын баһылыктарын, үлэһиттэрин, олохтоох бэйэни салайыныы уорганын дьокутааттарын, кылаабынай быраастары кытта чэпчэтиинэн туһанар нэһилиэнньэ араҥатын эминэн хааччыйыы боппуруостарын ырытыстыбыт. Өрөспүүбүлүкэ үрдүнэн бу боппуруоһу быһаарарга бүддьүөттэн 3,5 млрд. солк. тахса үп көрүлүннэ. Федеральнай нормативинын аахтахха, бу эрэгийиэн наадыйыытын 75-80% хааччыйар. Эми атыылаһыы быһаарыллан, дьон наадыйар эмэ сотору кэлиэхтээх. Маны сис кэмитиэт кыраҕатык кэтээн көрөр.
Эми атыылаһыыны биир сиргэ кииннээн оҥоруу түмүгэр Саха Сирин эминэн хааччыйарга биир сыана олохтонуоҕа, онон СӨ Доруобуйатын харыстабылын министиэристибэтэ сөптөөх суолу тутуһар.
Күн бүгүн мэдиссиинэ үлэһиттэринэн хааччыллыы син быһаарыллар эрээри, Ленскэйгэ, Нерюнгрига, Мииринэйгэ сорох Аартыка улуустарынааҕар быраастарынан хааччыллыы быдан намыһаҕа сөхтөрөр. Дьиҥэр, бырамыысыланнай оройуоннарга олох таһыма үрдүк эрээри, эмчиттэр тиийбэттэр. Улуус баһылыктарын кытта ыытыллыбыт үлэ түмүгэр сорох улуустар мэдиссиинэ үлэһиттэрин үлэҕэ ыҥырарга олохтоох бырагырааманы киллэрдилэр. Ол түмүгэр былырыын Нерюнгрига 40-ча быраас үлэлии барда.
Аартыка улуустарыгар мобильнай мэдиссиинэ биригээдэлэрэ үлэлииллэр, ол иһин нэһилиэнньэ доруобуйатын кэмигэр көрөллөр-истэллэр. Телемэдиссиинэ өҥөтүн киллэрэргэ хоту улуустарга түргэн интэриниэт ирдэнэр.
Быйылгы былааны билиһиннэрдэххэ, саҥа национальнай бырайыактар, «Көхтөөх уһун үйэлэнии», «Дьиэ кэргэн», «Демография» хайысхалар салгыы киириэхтэрэ. Кулун тутарга Аартыка улуустарыгар хат дьахталларга мэдиссиинискэй көмөнү оҥоруу туһунан мунньах ыытылына. Холобур, оҕолоноору сылдьар дьахтар УЗИ мониторинг оҥоттороору Дьокуускайга үстэ барыахтаах. Черскэй олохтооҕо биирдэ куоракка барар сырыытын төлөбүрэ 100 000 солк., оттон хат дьахтар үстэ баран кэлиэн наада. Биһиги сис кэмитиэппит бу боппуруоһу 2027 с. бүддьүөтү ылыныыга туруорсар. Ону таһынан, эминэн хааччыллыы быһаарыллыахтаах.
Хаартыска Светлана Давыдова архыыбыттан.
-
0
-
0
-
0
-
0
-
0
-
0
